បើតាមការបញ្ជាក់របស់ Camsoc ថាកម្ពុជា បានសម្រេចបញ្ជូនកីឡា១២ប្រភេទទៅហ្វឹកហាត់នៅប្រទេសចិន ចាប់ពីពាក់កណ្ដាលខែកញ្ញាឆ្នាំ២០២២នេះទៅ ដើម្បីពង្រឹងសមត្ថភាពត្រៀមស៊ីហ្គេម២០២៣ដែលកម្ពុជាធ្វើជាម្ចាស់ផ្ទះ។
ប្រភេទកីឡាទាំង១២នោះរួមមានកាយសម្ព័ន្ធ (១១នាក់), យូដូ (៥នាក់), វូស៊ូ (១០នាក់), បាល់បោះ (១៥នាក់), វាយកូនឃ្លីលើតុ (១០នាក់), អត្តពលកម្ម (២០នាក់), ចំបាប់ (១៥នាក់), វាយសី (១២នាក់), ហែលទឹក (១១នាក់), លើកទម្ងន់ (១០នាក់), បាល់ទាត់-នារី (២៥នាក់) និងបាល់ទះ (១៥នាក់)។ សរុបអត្តពលិកកម្ពុជា ១៦១នាក់ នឹងចេញទៅហាត់នៅចិន។ ដោយនេះជាជំនួយពីភាគីចិន ចេញថ្លៃចំណាយទាំងអស់តែម្ដង។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC បានមានប្រសាសន៍ថា ៖ការងារនេះមានការខកខានយូរពេក ដោយសារតែបញ្ហាកូវីដ ការរឹតត្បិតការចេញចូលនៅចិន អ៊ីចឹងយើងក៏បានពន្យារពេលមកដល់ពេលនេះ។ ឥឡូវនេះយើងទទួលបានគោលការណ៍អនុញ្ញាតដ៏ខ្ពង់ខ្ពស់ពីសម្តេចពិជ័យសេនា ប្រធានគណៈកម្មាធិការជាតិ CAMSOC រួចហើយ ថា នឹងអនុញ្ញាតឱ្យចេញឆាប់ៗនេះហើយ ព្រោះពេលវេលាយើងមិនអាចចាំបានយូរ។