ក្រុមបាល់ទាត់ក្នុងសាលDowntown Sport របស់កម្ពុជាបានធ្វើដំណើរដល់ប្រទេសថៃហើយ ដើម្បីត្រៀមខ្លួនប្រកួតពានរង្វាន់ AFF Futsal Cup 2022 នៅថ្ងៃទី៤ខែកញ្ញាឆ្នាំ២០២២នេះ។
ក្រុមតំណាងកម្ពុជាខាងលើស្ថិតនៅពូល A ជាមួយក្រុមBintang Timur Surabaya របស់ឥណ្ឌូណេស៊ី ក្រុម Perwira របស់ព្រុយណេ និងក្រុម Hongyen Thakam របស់ម្ចាស់ផ្ទះថៃ។ ការប្រកួតនឹងចាប់ផ្ដើមចាប់ពីថ្ងៃទី៤ខាងមុខនេះទៅ។ ដោយក្រុមកម្ពុជាមួយនេះសង្ឃឹមថានឹងធ្វើបានល្អទៀត ព្រោះពួកគេធ្លាប់ចូលលេងពានរង្វាន់ខាងលើនេះម្ដងកាលពីឆ្នាំ២០១៩កន្លងទៅ ហើយទទួលបានលទ្ធផលល្អប្រសើរផងដែរ។
ដោយកាលពីឆ្នាំនោះ ក្រុមDowntown Sport ទទួលបានចំណាត់ថ្នាក់លេខ៤ ហើយក៏ក្លាយជាក្រុមកម្ពុជាដំបូងគេតែម្ដងដែលអាចឆ្លងផុតវគ្គក្នុងពូល និងទទួលបានចំណាត់ថ្នាក់ល្អនេះក្នុងពានរង្វាន់បាល់ទាត់ក្នុងសាលកម្រិតតំបន់អាស៊ាន៕