ចាប់តាំងពីរដូវកាល ២០១៨/១៩ រៀងមក ដែលជាសម័យកាលមាសរបស់ក្លឹប Ajax នៅរយៈពេលជាង ២០ ឆ្នាំចុងក្រោយ ក៏នាំឲ្យក្លឹបចាប់ផ្ដើមបង្កើនចំណូលជាហូហែរតាមរយៈការលក់ចេញកីឡាករជាបន្តបន្ទាប់។ ចាំបានឆ្នាំនោះ ក្លឹបហូឡង់ ឡើងដល់វគ្គពាក់កណ្តាលផ្តាច់ព្រ័ត្រពាន UEFA Champions League ហើយបានឈ្នះជើងឯកពាន Eredivisie និង KNVB Cup។
ក្រោយបិទរដូវកាល Ajax សារនោះ លក់កីឡាករបានលុយជាង ២០០ លាន នៅទីផ្សារដោះដូររដូវក្តៅ ហើយបើរាប់ត្រួសៗអំពីចំណូលលើការផ្ទេរចេញកីឡាករ នៅ ៤ រដូវកាលចុងក្រោយ ពួកគេប្រមូលលុយបានជាងកន្លះពាន់លានអឺរ៉ូ ដែលជាចំណែកអ្នកទាំង ៤ រូបធំៗដូចខាងក្រោម៖
៤) Frenkie de Jong
បន្ទាប់ពីរីករាយនូវការបិទរដូវកាល ២០១៨/១៩ រំលងចូលដល់ខែកក្កដា ក្លឹបក៏បង្កើតកំណត់ត្រាថ្មីនោះគឺការផ្ទេរចេញកីឡាករថ្លៃបំផុតពីលីគ Eredivisie ពោលជាការលក់ Frenkie de Jong ឲ្យទៅក្លឹប Barcelona។
វត្តមានខ្សែបម្រើសញ្ជាតិហូឡង់ នៅទឹកដី Camp Nou នាំឲ្យ Ajax កើបប្រាក់ចូលហោប៉ៅបាន ៨៦ លានអឺរ៉ូ ហើយកីឡាករក៏កំពុងបន្តឈរជើងនៅទីនោះ ទល់សព្វថ្ងៃ។ វារាប់បានជាសន្ទុះនៃការកើនឡើងតម្លៃខ្លួនគួរឲ្យភ្ញាក់ផ្អើល ដ្បិតអី De Jong ពេលនោះ ស្ថិតនៅវ័យទើបតែ ២២ ឆ្នាំ ហើយបង្ហាញខ្លួនឲ្យ Ajax មិនទាន់បាន ១០០ ប្រកួតផង។
៣) Matthijs de Ligt
តាមពិតទៅ កីឡាកររួមសញ្ជាតិរបស់ De Jong ក៏ប្រុងនឹងផ្ទេរទៅ Barcelona ផងដែរ តែដោយសារឥទ្ធិពល Cristiano Ronaldo ក៏នាំឲ្យខ្សែការពារកម្ពស់បានរូបនេះ ជ្រើសការផ្ទេរទៅក្លឹប Juventus វិញ។
ជាមួយការផ្លាស់ទៅទ្រនំថ្មី នៅឯទឹកដីអ៊ីតាលី នាថ្ងៃទី ១៩ កក្កដា De Ligt បានក្លាយជាខ្សែការពារមានតម្លៃខ្លួនខ្ពស់បំផុតពេលនោះ ដល់ទៅ ៨៥,៥ លានអឺរ៉ូ តែក្រោយប៉ុន្មានថ្ងៃ Man Utd ក៏សាងកំណត់ត្រាថ្មី តាមរយៈការនាំយក Harry Maguire ពី Leicester នៅតម្លៃខ្ពស់ជាងនោះ ១,៥ លានអឺរ៉ូ ហើយទាញឲ្យ De Ligt ធ្លាក់មកឈរលេខ ២។
២) Lisandro Martinez
ឆ្លងមកដល់រដូវកាលថ្មី ២០២២/២៣ Ajax ក៏បានបង្កើនចំណូលមួយខ្ទាស់ធំទៀត បន្ទាប់ពីលោក Erik ten Hag ដើរចេញពីតំណែងអ្នកចាត់ការ ហើយផ្លាស់មកដឹកនាំក្លឹបបិសាចក្រហម Man Utd។ វត្តមានគ្រូសញ្ជាតិហូឡង់ ក៏បានអូសទាញយកបានអតីតកូនក្រុម Ajax យ៉ាងមានប្រសិទ្ធភាពផងដែរ។
ដូចការនាំយក Lisandro Martinez កំពុងក្លាយជាតារារះនៅ Premier League ពេលចុងក្រោយ គេបាននាំចំណូលឲ្យ Ajax ជាង ៥៧ លានអឺរ៉ូ ដែលនេះជាការផ្ទេរចេញខ្សែការពារថ្លៃបំផុតលំដាប់ទីពីររបស់លីគកំពូលហូឡង់ បន្ទាប់ពីកំណត់ត្រា De Ligt។
១) Antony
ស្ថិតនៅវ័យទើបតែ ២២ ឆ្នាំ ហើយរកបានត្រឹម ១២ គ្រាប់កាលពីរដូវកាលមុន តែ Antony អាចសាងកំណត់ត្រាប្រវត្តិសាស្រ្តប្រចាំលីគ Eredivisie ជាមួយតម្លៃ ៩៥ លានអឺរ៉ូ។ និយាយអំពីផលចំណេញ ជាមួយកីឡាករប្រេស៊ីល Ajax បានលុយគុណ ១ ទ្វេ ៦ ធៀបនឹងតម្លៃដើម ចាយឲ្យ Sau Paulo កាលពីឆ្នាំ ២០២០។ នេះសរុបមក ខ្ទង់ចំណូលទទួលបានពីកីឡាករទាំង ៤ គឺឈានដល់ជិត ៣២៥ លានអឺរ៉ូ៕
ប្រភព៖ បរទេស