ទើបឆ្លងកាត់៤ប្រកួតប៉ុណ្ណោះ ប៉ុន្ដែក្លឹប Bournemouth បានសម្រេចចិត្តបណ្ដេញអ្នកចាត់ការក្រុម Scott Parker ចេញហើយ ក្រោយពីចាញ់ច្រើនគ្រាប់ខ្លាំងពេកនៅ៣ប្រកួតចុងក្រោយ។
បើកឆាក Premier League ប្រកួតដំបូង ក្រុម Bournemouth បានយកឈ្នះលើក្រុម Aston Villa ក្នុងលទ្ធផល ២-០។ តែ៣ប្រកួតបន្ទាប់មកទៀត ក្រុមមួយនេះបានចាញ់ទាំង៣ប្រកួត ក្រោមថ្វីជើង Man City ៤-០ ចាញ់ Arsenal ៣-០ និងចុងក្រោយគេនេះចាញ់ក្រុម Liverpool ដល់ទៅ ៩-០ ឯណោះ។ ចាញ់ចុងក្រោយធ្ងន់កពេកនេះហើយ ទើបធ្វើឱ្យតំណែងរបស់លោកមិនរក្សាបានតទៅទៀតនោះទេ។ ដោយការប្រកាសបណ្ដេញលោក Parker ចេញ កើតឡើងនៅយប់មិញនេះឯង។
លោក Parker ក៏នឹងក្លាយជាអ្នកចាត់ការដំបូងគេតាំងពីឆ្នាំ២០០៤មក ដែលត្រូវដកចេញពីតំណែងនៅខែសីហាដើមរដូវកាល។ ដោយឡែកសម្រាប់តំណែងនេះ ក្រុម Bournemouth មិនទាន់ដឹងថាត្រូវយកនរណានោះទេ តែពួកគេក៏បានតែងតាំងលោក Gary O’Neil ដែលជាគ្រូជំនួយ មកដឹកនាំក្រុមបណ្ដោះអាសន្នសិនដែរ៕