នៅសល់ពេលតែជិតពីរម៉ោងទៀតប៉ុណ្ណោះ ក្លឹប Southampton នឹងត្រូវបើកកីឡដ្ឋានស្វាគមន៍ក្លឹប Man Utd ជាប្រកួតជុំទី ៤ នៅក្របខ័ណ្ឌអង់គ្លេស Premier League។ មុនការប្រកួតឈានចូលមកដល់ អ្នកចាត់ការលោក Erik ten Hag ក៏ត្រូវបានគេចោទសួរ អំពីស្ថានភាពកីឡាករ ២ រូប។
នោះគឺ ចំណូលថ្មី Casemiro ជាខ្សែបម្រើទើបទិញបានពី Real Madrid និងខ្សែប្រយុទ្ធ Anthony Martial។ គ្រូសញ្ជាតិហូឡង់ បានឆ្លើយថា៖ “Casemiro គេត្រៀមខ្លួនរួចរាល់ ក្រោយបានឆ្លងកាត់ការហ្វឹកហាត់ជាមួយក្រុម តែករណី Martial គេរងរបួស ហើយទាមទារពេលវេលាសម្រាកបែបណា គឺមានតែរង់ចាំមើលបន្តទៀត”។
នេះជាតម្រុយដែលយើងអាចទាយជាមុន ទំនងលោក Ten Hag នឹងដាក់ Cristiano Ronaldo ឲ្យលេងជម្រើសដំបូងក៏ថាបាន។ ប្រសិនជាការពិត នោះវាក៏អាចក្លាយជាប្រកួតដែលអតីតសមាជិក Real Madrid ទាំង ៣ សហការគ្នាលើទីលាន ពោល Raphael Varane នៅតំបន់ការពារ Casemiro នៅតំបន់បម្រើ និង Ronaldo នៅតំបន់ប្រយុទ្ធ៕
ប្រភព៖ BeSoccer