កាលពីយប់មិញស្ថាប័ន France Football បានប្រកាសចេញនូវបញ្ជីបេក្ខភាពទាំង ៣០ រូប ក្នុងការប្រជែងពានឯកត្តជន Ballon d’Or ប្រចាំឆ្នាំ ២០២២ ហើយសង្កេតឃើញ ផ្ទុះការចាប់អារម្មណ៍បន្ទាប់ពីអវត្តមានកីឡាករឆ្នើមមួយចំនួន ជាពិសេសគឺ Lionel Messi។
ម្ចាស់ពាន Ballon d’Or ៧ សម័យកាល ជាអ្នកឈ្នះច្រើនបំផុតក្នុងប្រវត្តិសាស្ត្រ បានខកខានស្ថិតក្នុងចំណោមកីឡាករបេក្ខភាព ជាលើកដំបូងរាប់តាំងពីឆ្នាំ ២០០៥។ ចំណែកឯអ្នកទាំង ៣០ នោះមានដូចជា៖ Thibaut Courtois, Rafael Leao, Christopher Nkunku, Mohamed Salah, Joshua Kimmich, Trent Alexander-Arnold, Vinicius Junior, Bernardo Silva, Luis Diaz, Robert Lewandowski, Riyad Mahrez, Casemiro, Heung-Min Son, Fabinho, Karim Benzema, Mike Maignan, Harry Kane, Darwin Nunez, Phil Foden, Sadio Mane, Sebastien Haller, Luka Modric, Antonio Rudiger, Cristiano Ronaldo, Kevin De Bruyne, Dusan Vlahovic, Virgil van Dijk, Joao Cancelo, Kylian Mbappe និង Erling Haaland។
បញ្ជាក់ឲ្យដឹងថា ដំណាក់កាលដំបូងនៃការជ្រើសយកឈ្មោះបេក្ខភាពទាំង ៣០ រូប គឺជាការសម្រេចចិត្តរបស់ France Football ផ្ទាល់ លុះដល់ដំណាក់កាលបោះឆ្នោតបន្ទាប់ ទើបប្រគល់ជូនទៅកាន់ស្ថាប័នអ្នកកាសែតតាមបណ្តាប្រទេស ដូចបានកំណត់។ បើទោះបីមានអ្នកគាំទ្រមួយចំនួន បានទទួលស្គាល់ តែក៏នៅមានខ្លះទៀត ហាក់មិនអស់ចិត្ត ឆ្ងល់ថា ដ្បិតអីត្រឹមបេក្ខភាព ៣០ រូប បែរជាមិនមានឈ្មោះកីឡាករអាហ្សង់ទីនទៅវិញ។ មិនទុកឲ្យមានការងឿងឆ្ងល់យូរ CTS SPORT សូមធ្វើការបកស្រាយ ផ្អែកទៅតាមការលើកឡើងយ៉ាងសមហេតុផល ពី France Football ដូចតទៅ៖
អ្នកតំណាងស្ថាប័នសារព័ត៌មានរបស់បារាំងខាងលើ គឺលោក Emmanuel Bojan បានរៀបរាប់បែបនេះ៖ “ជាការពិត Messi ក៏ស្ថិតក្នុងការពិចារណារបស់ពួកយើងដែរ ជុំវិញការដាក់ឈ្មោះទៅកាន់បេក្ខភាពទាំង ៣០ រូប ក៏ប៉ុន្តែគោលការណ៍និងលក្ខណៈវិនិច្ឆ័យថ្មី សម្រាប់ពាន Ballon d’Or វាហាក់មិនអំណោយផលដល់ឈ្មោះរបស់គេសោះ”។
“លក្ខណៈវិនិច្ឆ័យសមិទ្ធផលកីឡាករ នៅព្រឹត្តិការណ៍សារនេះតទៅមុខ យើងយកតាមកាលបរិច្ឆេទរដូវកាលបាល់ទាត់ ដូច្នេះមិនបានគិតពេញក្នុងឆ្នាំតែមួយ ដូចកាលពីមុនឡើយ អ៊ីចឹងវាធ្វើឲ្យខកខានក្នុងការរាប់បញ្ចូលនូវសមិទ្ធផលធំ នៃការឈ្នះពាន Copa America របស់ Messi នៅជម្រើសជាតិអាហ្សង់ទីនកាលពីថ្ងៃទី ១១ កក្កដា ឆ្នាំ ២០២១”។
នេះមានន័យថា គោលការណ៍ថ្មីរបស់ France Football គឺគេបានប្រៀបធៀបសមិទ្ធផលកីឡាករទាំងអស់ នៅរដូវកាលចាស់ រាប់ពីថ្ងៃទី ០១ សីហា ឆ្នាំ ២០២១ ដល់ ៣១ កក្កដា ឆ្នាំ ២០២២។ ខណៈដែលបុរសវ័យ ៣៥ ឆ្នាំ ក៏មិនបានសម្រេចអ្វីជាដុំកំភួនឡើយក្នុងកំឡុងពេលនោះ ពោលរដូវកាលដំបូង នៅ PSG ជាឆ្នាំដ៏អាក្រក់បំផុត ដែល Messi អាចរកបានតែ ៦ គ្រាប់នៅ Ligue 1 និង ១៥ គ្រាប់នៅគ្រប់ការប្រកួតទាំងអស់។ សាមញ្ញងាយយល់ទៅ បើព្រឹត្តិការណ៍ Copa America អាចបញ្ចប់មុនថ្ងៃទី ៣១ កក្កដា ម្ល៉េះការជាប់ឈ្មោះនៅបេក្ខភាព ៣០ រូប សម្រាប់កីឡាករខាងលើ ប្រាកដណាស់ នឹងគ្មានអ្វីឲ្យ France Football ត្រូវពិបាកសម្រេចចិត្តឡើយ។
បន្តទៅដំណាក់កាលបន្ទាប់ France Football នឹងបើកឲ្យស្ថាប័នសារព័ត៌មានតំណាងឲ្យជម្រើសជាតិទាំង ១០០ តាមកម្រិត FIFA Ranking ជ្រើសរើសកីឡាករ ៥ រូប ល្អបំផុត ទៅតាមលេខរៀង ហើយធ្វើការបូកពិន្ទុសរុបបញ្ចូលគ្នា ដើម្បីចម្រាញ់យកម្ចាស់ពាន នៅថ្ងៃទី ១៧ តុលា ប្រកាសនៅក្នុងទីក្រុងប៉ារីស ប្រទេសបារាំង។ សម្រាប់ CTS SPORT បើឲ្យជ្រើស ៣ រូប ដែលស្រលាញ់បំផុត ផ្អែកទៅតាមសមិទ្ធផលសម្រេចបាន គឺសូមដាក់ឈ្មោះ Karim Benzema នៅលេខ ១, Sadio Mane នៅលេខ ២ និង Vinicus Jr នៅលេខ៣ ចុះមតិយោបល់គ្នាយើងវិញ?
ប្រភព៖ បរទេស