លោក Maurizio Sarri អ្នកចាត់ការក្រុម Chelsea ចង់ឱ្យអ្នកគាំទ្រផ្ដល់ការគោរពដល់លោក Jose Mourinho ក្នុងការប្រកួតនៅល្ងាចនេះ។
Chelsea នឹងត្រូវបើកកីឡដ្ឋានរបស់ខ្លួន ស្វាគមន៍ក្រុមភ្ញៀវ Manchester United នាការប្រកួតលីគកំពូលអង់គ្លេស។ នេះជាការត្រលប់មកវិញជាថ្មីម្ដងទៀត របស់លោក Jose ក្នុងនាមជាអ្នកចាត់ការដែលធ្លាប់ដឹកនាំក្រុម Chelsea បានយ៉ាងជោគជ័យ។ យ៉ាងណាមិញ ការប្រកួតយប់នេះវិញទៀតសោត អ្នកចាត់ការថ្មី Sarri ចង់ឃើញអ្នកគាំទ្ររបស់ខ្លួន ស្វាគមន៍ក្រុមភ្ញៀវក៏ដូចជាលោក Jose បានយ៉ាងល្អ មិនមានការចំអកអ្វីឡើយ។
Sarri បាននិយាយក្នុងសន្និសីទកាសែតថា៖ “យើងកំពុងតែនិយាយពីគ្រូបង្វឹកម្នាក់ដែលឈ្នះពានគ្រប់យ៉ាង គ្រប់ទីកន្លែង។ ខ្ញុំគោរពគាត់ ប៉ុន្តែខ្ញុំគិតថា អ្នករាល់គ្នាក៏ត្រូវតែគោរពគាត់ដែរ។ ខ្ញុំនិយាយនេះ ដោយសារតែខ្ញុំខ្លាចការប្រកួតយប់នេះ គាត់មិនទទួលបានការគោរពមួយ ឱ្យសមនឹងអ្វីដែលគាត់ធ្លាប់ធ្វើ”៕ប្រភព៖ dailymail