អ្នកស្នេហាវិស័យកីឡាបាល់ទាត់ ឆ្លងពីមួយឆ្នាំទៅមួយឆ្នាំ ក៏ត្រូវកាត់ចិត្តជាបន្តបន្ទាប់ ជាមួយការចូលនិវត្តនៃកីឡាករកំពូល ហើយសម្រាប់ព្រឹត្តិការណ៍ World Cup 2022 ខាងមុខ ក៏ទំនងជារជ្ជកាលចុងក្រោយរបស់តារាឆ្នើមទាំង ៧ រូបខាងក្រោមផងដែរ៖
៧) Robert Lewandowski – ប្រធានក្រុមជម្រើសជាតិប៉ូឡូញ បានឈរជើងតាំងពីឆ្នាំ ២០០៨ ហើយនៅ World Cup ខាងមុខ ក៏នៅធានាពីឱកាសបង្ហាញខ្លួនសម្រាប់បុរសវ័យ ៣៣ ឆ្នាំ។ យ៉ាងណាឆ្លងទៅ ៤ ឆ្នាំបន្ទាប់ ស្ថិតនៅវ័យ ៣៧ ឆ្នាំ ដែលសហរដ្ឋអាមេរិក ម៉ិកស៊ីកូ និងកាណាដាកំណត់ធ្វើជាម្ចាស់ផ្ទះ ទំនងអាចនឹងមិនឃើញវត្តមានខ្សែប្រយុទ្ធខាងលើបន្តទៀតឡើយ។
៦) Angel di Maria – កីឡាករ Juventus ក៏មកចូលរួមជួយជម្រើសជាតិអាហ្សង់ទីន នៅល្បាក់ឆ្នាំ ២០០៨ ដូចគ្នា ហើយឆ្លងទៅ ៤ ឆ្នាំបន្ទាប់ Di Maria នឹងហៀរចូលវ័យ ៣៨ ឆ្នាំ អ៊ីចឹងមានភាគរយទាបណាស់ ដែលខ្សែប្រយុទ្ធជំនាញជើងឆ្វេងរូបនេះ អាចបន្តនៅ។
៥) Edinson Cavani – បុរសវ័យ ៣៥ ឆ្នាំ សឹងតែបាត់មុខពីទីលាននៅពេលចុងក្រោយ ជាពិសេសការលេងឲ្យក្លឹប ហើយនៅជម្រើសជាតិអ៊ុយរុយហ្គាយ បើទោះបីបន្តទទួលបានឱកាស តែមតិជាច្រើនជឿថា ប្រហែលបានត្រឹម World Cup 2022 ប៉ុណ្ណោះឯង ព្រោះអីគ្រាប់ពេជ្រជំនាន់ក្រោយៗកំពុងដុះពន្លកបានយ៉ាងល្អ តួយ៉ាងដូចជា Darwin Nunez និង Maximiliano Gomez ជាដើម។
៤) Hugo Lloris – បើទោះបីសព្វថ្ងៃ នៅបន្តជាដៃទីមួយ ឲ្យក្រុមមាន់គកបារាំង តែអាយុរបស់ Lloris កំពុងក្លាយជាមន្ទិលសង្ស័យ ដោយនៅចុងឆ្នាំខាងមុខ គេត្រូវហៀរចូលវ័យ ៣៦ ឆ្នាំ ហើយកៀកចូល ៤០ ឆ្នាំ នៅ World Cup សម័យកាលបន្ទាប់។ ដោយសារស្គាល់ជាតិលើកពានរួចទៅហើយ គួបផ្សំនឹងអ្នកចាំទីដៃទីពីរ Mike Maignan លេងឲ្យ AC Milan បានល្អ ដល់ឈ្នះពានរដូវកាលមុនផង ដូច្នេះអ្នកចាត់ការជម្រើសជាតិ ក៏អាចនឹងសម្លឹងការផ្លាស់ប្តូរដូចគ្នា។
៣) Luka Modric – ធ្លាប់ជាចំណែកជួយឲ្យក្រូអាតឡើងដល់វគ្គផ្ដាច់ព្រ័ត្រ World Cup ជាលើកដំបូង ហើយព្រឹត្តិការណ៍សារនេះ ក៏រំពឹងនឹងមានវត្តមានខ្សែបម្រើក្លឹប Real Madrid ដដែល តែចូលដល់សម័យកាលបន្ទាប់ ២០២៦ នៅពេល Modric ឈានចូលវ័យ ៤០ ឆ្នាំ គឺមានការរំពឹងទុកទាបណាស់ ជារួមកីឡាករអាចនឹងចូលនិវត្តមុននោះក៏ថាបាន។
២) Cristiano Ronaldo – កំណត់ត្រាធំៗនៅជម្រើសជាតិ CR7 ឈោងបានអស់ហើយ នៅឡើយតែការឈ្នះពាន World Cup ហើយចុងឆ្នាំខាងមុខ គឺជាឱកាសថ្មី តែក៏អាចជាឱកាសលើកចុងក្រោយផងដែរ។ ក៏ដោយសារស្ថិតនៅវ័យ ៣៧ ឆ្នាំទៅហើយ ណាមួយគុណភាពគ្រាប់ពេជ្រជំនាន់ក្រោយៗ ក៏ល្អច្រើន ដែលអាចមកបំពេញតំណែងជាម៉ាស៊ីនបញ្ចប់ទីថ្មីបាន ដូចជា Andre Silva, Rafael Leao និង Joao Felix ជាដើម។
១) Dani Alves – ជាកីឡាករឈ្នះពានច្រើនបំផុត ដល់ទៅ ៤៣ គ្រឿង តែជាមួយជម្រើសជាតិប្រេស៊ីល គឺនៅរំលងពានធំ World Cup។ យ៉ាងណាពេលចុងក្រោយ តំណែងការពារស្លាបស្តាំ ច្រើនតែធ្លាក់ទៅលើ Danilo ជាហេតុនាំឲ្យមានការជឿជាក់ថាព្រឹត្តិការណ៍ ឆ្នាំ ២០២២ ប្រាកដណាស់ នឹងក្លាយជា World Cup លើកចុងក្រោយ ជួនពេលកីឡាករក៏មានវ័យ ៣៩ ឆ្នាំទៅហើយ៕
ប្រភព៖ បរទេស