នៅវិញ្ញាសាវាយសី ប្រចាំព្រឹត្តិការណ៍ស៊ីហ្គេមក្នុងប្រទេសវៀតណាម កាលពីពេលកន្លងទៅ ទាំងផ្នែកបុរសនិងនារី មេដាយមាសសុទ្ធសឹងតែបានទៅលើកីឡាករ/កីឡាការនីមកពីប្រទេសថៃ ហើយក្នុងចំណោមអត្តពលិកដែលមកចូលរួម គ្រប់គ្នាបានផ្ទុះការចាប់អារម្មណ៍ខ្លាំង ទៅលើក្មេងស្រីតូចវ័យទើប ១៥ ឆ្នាំ ឈ្មោះ Pitchamon Opatniputh [พิชฌามลณ์ โอภาสนิพัทธ์]។
នាងជាកីឡាការនីវ័យក្មេងបំផុត ក្នុងចំណោមកីឡាការនីទាំង ១០ រូប ដែលសមាគមវាយសីរបស់ថៃ បញ្ជូនមកចូលរួមក្នុងព្រឹត្តិការណ៍ស៊ីហ្គេមលើកទី ៣១។ ក្នុងអត្ថបទនេះ CTS Sports ធ្វើការបង្ហាញត្រួសៗអំពីការចាប់ផ្តើម សមត្ថភាព និងឆន្ទៈរបស់ក្មេងស្រីតូច ដែលមានឈ្មោះហៅក្រៅថា “Pink” ក៏ដូចជារូបសម្រស់ឆក់យកបានបេះដូងយុវជនជាច្រើន ជាពិសេសអ្នកស្រលាញ់កីឡាវាយសី៖
Pink ទទួលបានការគាំទ្រ និងត្រួសត្រាយផ្លូវតាំងតែពីនាងនៅតូច អាយុ ៥ ឆ្នាំ ហើយមានឪពុករបស់នាងជាអ្នកបង្វឹកផ្ទាល់ លុះធំបន្តិច ក៏ហ្វឹកហាត់ពេញម៉ោង ជាមួយគ្រូ Kasemsak Chatuchinda ជាពេលនាងចាប់ផ្តើមប្រលូកក្នុងការប្រកួតលក្ខណៈអាជីព និងកើនបទពិសោធន៍ពីការប្រកួតលើកឆាកអន្តរជាតិនានា។
យុវតីកម្ពស់ ១,៧០ ម៉ែត្ររូបនេះ កាលពីនាងនៅអាយុ ១២ ឆ្នាំ ក៏ធ្លាប់បានឈ្នះនៅព្រឹត្តិការណ៍ World Badminton U15 Shonai Invitational 2019 គ្រាយកឈ្នះទៅលើកីឡាការនីជប៉ុន ត្រឹមការប្រើប្រាស់ពេល ២៨ នាទី។
ក្រោយមកកាលពីព្រឹត្តិការណ៍ឆ្នាំ ២០២២ នៅឯប្រទេសស៊ុយអែត ក៏នាងបន្តយកជ័យជម្នះមកជូនជាតិ ទើបនាំឲ្យសមាគមប្រចាំផ្ទៃប្រទេស មើលឃើញពីសមត្ថភាព ហើយសម្រេចកោះហៅនាងឲ្យមកចូលរួមជាអត្តពលិកលើវិញ្ញាសាវាយសី នៅ SEA Games ក្នុងទីក្រុងហាណូយ កាលពីប៉ុន្មានខែមុន។ តាមការវាយតម្លៃពីគេហទំព័រ Badminton-navi.net សម្រាប់យុវតីវ័យ ១៥ ឆ្នាំខាងលើ ក៏ធ្លាប់ជាប់ចំណាត់ថ្នាក់ខ្ពស់បំផុតនៅលេខរៀង ២០៥ ក្នុងចំណោមកីឡាការនីវាយសីទូទាំងសកលលោក។
Pink ធ្លាប់បាននិយាយកន្លងទៅថា៖ “ជាមួយកីឡាវាយសី ខ្ញុំបានឆ្លងកាត់ការហ្វឹកហាត់ជារៀងរាល់ថ្ងៃ ពោលមួយអាទិត្យសម្រាកតែមួយថ្ងៃប៉ុណ្ណោះ នេះខ្ញុំបានអនុវត្តវាដដែលៗរៀងរាល់ព្រឹក និងល្ងាច ហើយមុនការឈ្នះនៅព្រឹត្តិការណ៍ Victor Swedish Open 2022 ខ្ញុំក៏ធ្លាប់ត្រូវបានគេដកឈ្មោះពីការប្រកួត Estonian International ដោយសារពេលនោះរបួសជើង ហើយពេលមានអាកាសធាតុត្រជាក់ខ្លាំង វាពិតជាឈឺចាប់ណាស់”។
អំពីឆន្ទៈទៅថ្ងៃអនាគត Pink ចង់ក្លាយជាកីឡាការនីវាយសីលំដាប់ពិភពលោកមួយរូប ក៏ដូចជាអាចដើរតាមគន្លងជោគជ័យ ដូចរៀមច្បង គឺកីឡាការនីចំណាត់ថ្នាក់លេខប្រចាំប្រទេសថៃ គឺ Ratchanok Intanon ដែលមានអាយុ ២៧ ឆ្នាំ៕
ប្រភព៖ បរទេស