តារាបាល់ទាត់ជាច្រើន ក្រៅតែទំនេរពីទីលានប្រកួត ពួកគេក៏ឆ្លៀតពេលលំហែ ទៅតាមចំណង់រៀងៗខ្លួន ខ្លះទៅចូលចិត្តវាយកូនគោល ខ្លះដើរហើរទៅតាមតំបន់កម្សាន្ត និងមួយផ្នែកធំទៀត បានចាយពេលទៅលើការលេងហ្គេម។
ការលេងហ្គេមនេះសោត សម្រាប់កីឡាករបាល់ទាត់ដែលរកលុយបានរាប់មុឺនដុល្លារ/សប្ដាហ៍ ពួកគេក៏មិនញញើតនោះដែរ ក្នុងការចាយវាយទៅលើឧបករណ៍ ឬម៉ាស៊ីនហ្គេមដែលមានតម្លៃថ្លៃ ក៏ដូចជាសម្ភារៈ ឬ Item ផ្សេងៗ សម្រាប់តួអង្គរបស់ពួកគេ។ CTS Sports ធ្វើការបង្ហាញនូវកីឡាករបាល់ទាត់ ៣ រូប ដែលមានដុងលើវិស័យហ្គេម ហើយសមត្ថភាពរបស់ពួកគេបើតាមដឹងសឹងតែអាចក្លាយជា Gamer អាជីពថែមទៀតផង៖
៣) Antoine Griezmann
ជោគជ័យខ្លាំងកាលនៅ Atletico Madrid ក៏ប៉ុន្តែពេលចុងក្រោយ គេសឹងតែភ្លេចឈ្មោះពីទីលាន ក្រោយមិនអាចបង្កើតផ្លែផ្កាអ្វីសោះ ឲ្យក្លឹបនិងជម្រើសជាតិបារាំង។ អ្នកគាំទ្រកីឡាករវ័យ ៣១ ឆ្នាំ ប្រហែលជាធ្លាប់ចាប់អារម្មណ៍ជុំវិញស្ទាយអបអរ លើកដៃបង្ហាញទម្រង់រាងអក្សរ “L” ដែលនោះ គឺជាក្បាច់រាំរបស់តួអង្គក្នុងហ្គេម Fortnite។
ហ្គេម Online របស់ក្រុមហ៊ុន Epic មួយនេះ តាមដឹងត្រូវបាន Griezmann ចាប់ផ្តើមលេងតាំងពីឆ្នាំ ២០១៨ រីឯចំពោះ ម៉ាស៊ីនហ្គេមដែលខ្សែប្រយុទ្ធបារាំងជ្រើសមកប្រើប្រាស់ គឺ Xbox មិនមែន PlayStation នោះឡើយ។ គេក៏ធ្លាប់បានលើកឡើងនូវសម្តីគួរឲ្យចាប់អារម្មណ៍៖ “ខ្ញុំហ៊ាននិយាយថា ការលេងយកលេខ ១ ឬ Victory Royale នៅក្នុងហ្គេម Fortnite វាស្រ្តេសវាពិបាកជាងការដែលស៊ុតបាល់ក្នុងប្រអប់គ្រោះថ្នាក់ទៅទៀត”។
២) Neymar Jr
តារាឆ្នើមរបស់ក្លឹប PSG លេងទាំងលើប្រភេទម៉ាស៊ីនហ្គេម Console ក៏ដូចជាលើកុំព្យូទ័រ PC ហើយហ្គេមគេនិយមឃើញលេងបំផុតរួមមាន Pro Evolution Soccer (PES), Fornite, Call of Duty, PUBG, GTA តែពេលចុងក្រោយ ឃើញសកម្មខ្លាំងក្នុងការលេងហ្គេម CS:GO ហើយថែមទាំងមានផ្សាយផ្ទាល់លើគណនី Facebook ទៀតផង។
គុណភាពរបស់កីឡាករប្រេស៊ីល មិនអាចមើលស្រាលបានទេ ជាពិសេសបើអ្នកដែលយល់ពីការលេងហ្គេម ដូចជា CS:GO ទើបដឹងថា Neymar មានដុងពិតៗ ល្មមអាចសាងឈ្មោះជា Gamer ឬបង្កើតជាលក្ខណៈក្រុមអាជីព ចូលប្រកួត esportក៏បាន។
១) Mesut Ozil
ជួនពេលដែលអាជីពបាល់ទាត់កំពុងតែផុងចុះ សង្ស័យកៀកឈានចូលដល់ពេលវេលាចូលនិវត្ត កន្លងទៅភ្នាក់ងាររត់ការរបស់កីឡាករ Mesut Ozil គឺលោក Erkut Sogut បានបង្ហើបថា ពេលទៅមុខ កីឡាករអាល្លឺម៉ង់ បើចង់បោះជំហានទៅជាអត្តពលិកលើវិស័យ eSports នោះក៏អាចធ្វើទៅបានដោយងាយ។
លោក Sogut និយាយ៖ “Ozil នឹងអាចប្រលូកក្នុងវិស័យ eSports ឬអាចក្លាយជាអត្តពលិកអាជីព ស្មោះត្រង់ទៅគេលេងបានល្អខ្លាំងណាស់ ជាពិសេសហ្គេម Fornite នេះគេថែមទាំងមានក្រុមផ្ទាល់ខ្លួនទៀតផង គឺ M10 Esports ហើយមានសមាជិក មានផ្ទះលេងហ្គេមជុំគ្នាមួយនៅឯអាល្លឺម៉ង់ ដោយក្រៅតែពី Fortnite គេក៏ជាអ្នកលេងហ្គេម FIFA ដ៏ជំនាញផងដែរ”៕
ប្រភព៖ បរទេស