នៅវេលាម៉ោង ១០:០០ នាទីយប់ ថ្ងៃអាទិត្យ ទី ២២ ឧសភា លើទំព័រ CTS Sports នឹងមានការផ្សាយផ្ទាល់នូវគូពិសេសជាច្រើន ពោលនឹងផ្ដោតសំខាន់លើកិច្ចបញ្ចប់រដូវកាលនៅ Premier League។ សារនេះខុសពីជុំមុនៗ ដោយសមាគមបាល់ទាត់អង់គ្លេស បានសម្រេចដាក់ការប្រកួតទាំងអស់ ទៅក្នុងថ្ងៃតែមួយ ម៉ោងតែមួយ ព្រោះដើម្បីបញ្ចៀសសកម្មភាពលំអៀង ឬទង្វើស៊ីសំណូកណាមួយ។
ទន្ទឹមនោះ យើងសូមបង្ហាញរឿងរ៉ាវគួរឲ្យចាប់អារម្មណ៍ទាំង ៦ ដែលនឹងសម្រេចយកលទ្ធផលបញ្ចប់ ត្រឹមយប់ថ្ងៃអាទិត្យ៖
១) ការកំណត់យកម្ចាស់ពាន PL – រវាង Man City, Liverpool នឹងមានមួយ សម្រេចក្លាយជាម្ចាស់ជើងឯកលីគកំពូលអង់គ្លេស ខណៈពេលនេះ មេឃខៀវ នាំមុខទៅលើហង្ស ១ ពិន្ទុ ដូច្នេះខាងក្រុមលោក Pep Guardiola ប្រាកដណាស់ នឹងមានភាគរយច្រើនជាង។ នៅម៉ោង ១០:០០ នាទីយប់ City នឹងត្រូវប៉ះ Aston Villa ស្របពេលដែល Liverpool ត្រូវប៉ះ Wolves ហើយបើឈ្នះទាំងពីរ នោះ City ត្រូវក្លាយជាម្ចាស់ពាន។
២) ការកំណត់យកកៅអី UCL – City, Liverpool និង Chelsea បានធានារួចរាល់ នូវកៅអីឆ្ពោះទៅព្រឹត្តិការណ៍ពានអឺរ៉ុបរដូវកាលក្រោយ នៅឡើយ ១ កៅអីទៀត នឹងសម្រេចនាជុំទី ៣៨ រវាង Tottenham Hotspur ឬក៏ Arsenal។ ប្រកួតខាងមុខ បើ Spurs ស្មើ Norwich នោះនឹងបញ្ចប់រដូវកាលឈរលេខ ៤ ហើយបើចាញ់ Norwich ជួនពេល Arsenal ឈ្នះ Everton នោះនឹងឈរចំណាត់ថ្នាក់ទី ៥។
៣) ការកំណត់យកកៅអី Europa League – ជាមួយគ្នានេះដែរ កៅអី Europa League និង Conference League ក៏នឹងត្រូវសម្រេចនៅថ្ងៃតែមួយ ដោយប្រសិនណាជា Man Utd អាចយកឈ្នះ Crystal Palace នោះពួកគេនឹងឈរលេខ ៦ បានកៅអី Europa ផ្ទុយទៅវិញ បើស្មើ ជួនពេល West Ham យកបាន ៣ ពិន្ទុពី Brighton នោះនឹងឈរលេខ ៧ បានត្រឹមកៅអី Conference League។
៤) ការកំណត់យកក្លឹបទី ៣ ដែលត្រូវធ្លាក់ចេញ – Everton ឯណោះបានឆ្លងផុតហើយ នៅឡើយតែ Burnley និង Leeds United កំណត់ត្រូវមានមួយ ធ្លាក់ចេញទៅលីគលំដាប់ទីពីរ Championship ជាមួយនឹង Watford ក៏ដូចជា Norwich City។ ៣៥ ពិន្ទុស្មើសម្រាប់ក្រុមទាំងពីរ តែគ្រាប់បាល់ចំណេញ Burnley មានប្រៀបជាង ដូច្នេះបើជុំចុងក្រោយ ឈ្នះទាំងពីរ នោះ Leeds នឹងកំណត់ក្លាយជាក្រុមដែលត្រូវធ្លាក់។
៥) ពានឯកត្តជន Top Scorer&Assist – Mohamed Salah មាន ២២ គ្រាប់ នាំមុខតែមួយគ្រាប់គត់លើ Son Heung-min ដែលមាន ២១ គ្រាប់។ គ្រប់គ្នាកំពុងចាំអ៊ុតមើលថា តើប្រកួតជុំចុងក្រោយ ចំនួនគ្រាប់បាល់នឹងមានការប្រែប្រួល ឬនៅនឹងបែបនេះ។ ស្រដៀងគ្នានឹង Top Assist គឺសុទ្ធជាសមាជិកហង្ស ដោយ Salah មាន ១៣ លើក និង Trent Alexander-Arnold មាន ១២ លើក។
៦) ពានស្រោមដៃមាស – អ្នកចាំទី Alisson Becker របស់ Liverpool និង Ederson របស់ Man City កំពុងមានចំនួន Clean Sheet ២០ លើកស្មើគ្នា ដូច្នេះប្រកួតជុំចុងក្រោយ បើនរណាអាចសង្រ្គោះមិនឲ្យកើតមានគ្រាប់បាល់បញ្ចូលទី នោះនឹងក្លាយជាម្ចាស់ពានស្រោមដៃមាសប្រចាំឆ្នាំ ២០២២។ ក៏ប៉ុន្តែបើក្នុងករណី City និង Liverpool ទប់បាន ០ គ្រាប់ដូចគ្នា នោះពានរង្វាន់នឹងត្រូវចែក ដូចកាលជំនាន់រដូវកាល ២០១៨/១៩ ដែល Top Scorer បានទៅលើកីឡាករបីរូបនៅរដូវកាលតែមួយ មាន Mohamed Salah, Sadio Mane និង Pierre-Emerick Aubameyang៕
ប្រភព៖ បរទេស