អនាគតរបស់ Cristiano Ronaldo កំពុងស្ថិតក្រោមភាពមិនប្រាកដប្រជា ថានឹងបន្តនៅ ឬចាកចេញ ដ្បិតបើសុពលភាពកុងត្រាសេសសល់ដល់ចុងខែមិថុនា ឆ្នាំ ២០២៣។ មតិមួយចំនួនក៏ណែនាំឲ្យលោកគួរបន្តនៅ រីឯខ្លះទៀតថា ពេលវេលានៃការបែកគួរតែមកដល់ហើយ មិនដូច្នោះទេ ភាពល្បីល្បាញរបស់តារាឆ្នើមព័រទុយហ្គាល់នឹងធ្លាក់ចុះជាមិនខាន មុនការចូលនិវត្ត។
ងាកមកមតិរបស់ជើងចាស់នៅ United លោក Dion Dublin ក៏បានបញ្ជាក់ថា Ronaldo គួរតែចាកចេញ ហើយគួរបន្តនៅ លុះត្រាតែក្នុងករណីថ្នាក់លើក្លឹបព្រមទម្លាក់លុយ ៣០០ លានឲ្យអ្នកចាត់ការថ្មី លោក Erik ten Hag ចាយវាយលើការនាំយកកីឡាករថ្មី មកបំពេញចន្លោះនៅរដូវកាលខាងមុខ។
ប្រាប់ទៅ Sky Sports លោក Dublin និយាយ៖ “ខ្ញុំមើលអត់ឃើញហេតុផលដែល Ronaldo គួរបន្តនៅទេ តែក៏អត់ដឹងថា គេនឹងវិលត្រលប់ទៅអ៊ីតាលី ឬអេស្ប៉ាញអីវិញដែរ គ្រាន់ថា បើក្លឹបមិនផ្តល់ឲ្យ ៣០០ លានផោន លើការចាយវាយពេលខាងមុខទេ ដូច្នេះខ្ញុំគិតថា Ronaldo គួរតែចាកចេញទៅ ទើបជាជម្រើសល្អបំផុត”៕
ប្រភព៖ Football-Espana