មានដំណឹងយប់មិញនេះថា Kylian Mbappe បានឈានដល់កិច្ចព្រមព្រៀងបន្តកុងត្រាថ្មី រយៈពេល ២ ឆ្នាំ ជាមួយក្លឹបយក្សបារាំង Paris Saint-Germain។ តែយ៉ាងណាភ្លាមៗ ក៏ស្រាប់តែម្តាយបង្កើតរបស់កីឡាករវ័យ ២៣ ឆ្នាំ ចេញមកច្រានចោល ថាវាមិនមែនជាការពិតទេ។
ជាការពិតសុពលភាពកុងត្រារបស់ Mbappe ជាមួយក្លឹប PSG នឹងត្រូវផុតនៅចុងខែមិថុនា ឆ្នាំ ២០២២ ហើយចម្លើយច្បាស់ការបន្ទាប់ គេចង់ដឹងថា យុវជនបារាំង នឹងបន្តកុងត្រាថ្មី ឬក៏ផ្ទេរចេញនៅលក្ខខណ្ឌឥតតម្លៃខ្លួនទៅកាន់ក្លឹបអេស្ប៉ាញ Real Madrid។ ក៏លឺថា ក្លឹបអេស្ប៉ាញកំពុងចរចា នៅដំណាក់កាលចុងក្រោយ គឺទាក់ទិននឹងថ្លៃពលកម្ម ព្រោះអីកីឡាករហាក់ទារខ្ពស់ជ្រុល ដែលលើសលទ្ធភាពរបស់ក្លឹប។
បើតាមការបញ្ជាក់ពីម្តាយរបស់ Mbappe បានបង្ហោះសារលើ Twitter បែបនេះ៖ “មិនទាន់មានការព្រមព្រៀងណាមួយទេ រវាងភាគីក្លឹប PSG ឬសូម្បីតែក្លឹបដទៃណាក្តី សម្រាប់ករណីរបស់ Mbappe ហើយនិយាយអំពីអនាគតពេលទៅមុខ គេនឹងសម្រេចឲ្យបានល្អបំផុត ជាមួយនឹងការគោរពដល់ភាគីទាំងអស់ដែលពាក់ព័ន្ធ”។ គួរឲ្យដឹងថា ស្ថិតិ Mbappe រដូវកាលនេះ នៅតែខ្លាំង ដោយបង្ហាញខ្លួន ៤៣ ប្រកួត រកបាន ៣៥ គ្រាប់និង Assist ២៣ លើក៕