Liverpool បានឡើងទៅកាន់វគ្គផ្តាច់ព្រ័ត្រ Champions League ជាលើកទី ៣ នៅរយៈពេល ៥ ឆ្នាំចុងក្រោយ បន្ទាប់យកឈ្នះ Villarreal ក្រោមលទ្ធផលសរុប ៥-២។ ក្រុមដឹកនាំដោយលោក Jurgen Klopp កំណត់ត្រូវប៉ះសត្រូវចាស់ជាថ្មី គឺ Real Madrid នៅវេលាម៉ោង ០២:០០ នាទីទាបភ្លឺ ឈានចូលថ្ងៃទី ២៩ ឧសភា មានផ្សាយផ្ទាល់លើទំព័រ CTS Sports។
ងាកទៅការយល់ឃើញរបស់លោក Michael Owen អតីតកីឡាករនៅហង្ស បានប្រាប់ប៉ុស្តិ៍ BT Sport ដោយសរសើរមិនដាច់ពីមាត់ដល់ Virgil van Dijk ជាខ្សែការពារសំខាន់ ជួយហង្សអាចឡើងមកដល់វគ្គនេះ។ Owen ថា៖ “ស្តាប់ណា Van Dijk ជាខ្សែការពារកណ្តាលល្អបំផុតក្នុងលោកនៅពេលបច្ចុប្បន្ននេះ”។
លោកបន្ត៖ “ខ្ញុំនឹងកាន់តែនិយាយវែងឆ្ងាយ ហ៊ានថា Van Dijk ជាខ្សែការពារល្អបំផុតគ្រប់ពេលវេលា ដោយ Rio Ferdinand ធ្លាប់ជាខ្សែការពារល្អបំផុតខ្ញុំបម្រើអាជីពជាមួយ តែនេះ Van Dijk មើលទៅគេចុះ តើអ្នកនឹងតតាំងគេដោយរបៀបម៉េច គេមាឌធំ គេលឿន គេមាំ គេឈ្លាសវៃ គេរកបានគ្រាប់បាល់ ខ្ញុំមិនធ្លាប់ឃើញនរណាពីមុនមកអ៊ីចឹងទេ”៕
ប្រភព៖ BT Sport