កីឡាករប៉ុន្មានរូបចុងក្រោយ ដែលទើបផ្ទេរមកក្លឹប Paris Saint-Germain ហាក់ឃើញថា មានតែ Achraf Hakimi មួយប៉ុណ្ណោះ រាងទទួលបានផ្លែផ្កាគួរសម សល់ប៉ុន្មានគឺមិនទទួលបានជោគជ័យឡើយ នាំឲ្យកីឡាករខ្លះគិតចង់ចែកផ្លូវត្រឹមទីផ្សារដោះដូរខាងមុខទៀតផង។
បើតាមសារព័ត៌មាន L’Equipe ចុះផ្សាយថា អ្នកចាំទី Gianluigi Donnarumma គិតចង់វិលត្រលប់ទៅទ្រនំចាស់ AC Milan វិញហើយ ក្រោយធ្វើមិនបានល្អនៅក្លឹប PSG។ គេជឿថា បើបន្តនៅក្លឹបមានមូលដ្ឋានក្នុងទីក្រុងប៉ារីស នោះអាជីពរបស់គេអាចនឹងធ្លាក់ចុះខ្លាំងបន្ថែមទៀតនៅរដូវកាលក្រោយៗ។
ឆ្លៀតពេលវេលានេះខាងភាគីក្លឹបអ៊ីតាលី AC Milan ក៏ចាប់អារម្មណ៍ចង់នាំយកបុរសសញ្ជាតិអ៊ីតាលីត្រលប់មកវិញដូចគ្នា។ តែយ៉ាងណា Milan នឹងត្រូវប្រជែងជាមួយក្លឹបរួមលីគ Juventus នៅការនាំយក Donnarumma ជាមួយហាងឆេងតម្លៃខ្លួនល្បាក់ ៦៥ លានអឺរ៉ូ។ ស្ថិតិរដូវកាលនេះ គេបង្ហាញខ្លួន ២២ ប្រកួត របូត ២០ គ្រាប់ សង្រ្គោះ Clean Sheet បានតែ ៨ លើកគត់៕
ប្រភព៖ L’Equipe