Liverpool កំពុងបោះជំហានទៅមុខបានយ៉ាងល្អ ដ្បិតបើពេលចុងក្រោយមានការប្រកួតមមាញឹកខ្លាំង តែក្តីសង្ឃឹមលើកពានរង្វាន់ ៤ នៅរដូវកាលទោល គឺនៅតែមានដដែល។ សម្រាប់រដូវកាល ២០២១/២២ ក្រុមដឹកនាំដោយលោក Jurgen Klopp បានឈ្នះពាន EFL Cup មួយរួចមកហើយ ខណៈនៅសល់ ៣ ពានផ្សេងទៀត មានដូចជា FA Cup, Premier League និង UEFA Champions League។
គ្រប់គ្នាកំពុងចង់ដឹងជាខ្លាំង ថាតើហង្សអាចបង្កើតកំណត់ត្រាប្រវត្តិសាស្រ្ត លើកពាន ៤ នៅរដូវកាលតែមួយបានដែរឬទេ? រីឯមតិខ្លះក៏មានការងឿងឆ្ងល់ ថាប្រសិនក្លាយជាការពិតមែននោះ ចុះប្រាក់រង្វាន់ ដែលក្លឹបម្ចាស់ដី Anfield ទទួលបាន នឹងច្រើនដល់កម្រិតណាដែរ?
យើងនិយាយអំពីពាន EFL Cup ឬ Carabao Cup ដែល Liverpool បានយកឈ្នះទៅលើ Chelsea នៅបាល់ប៉េណាល់ទីកាត់សេចក្តីលទ្ធផល ១១-១០ កាលពីថ្ងៃទី ២៧ កុម្ភៈ ពេលនោះ ហង្សទទួលបានប្រាក់រង្វាន់តែ ១០០ ០០០ ផោនប៉ុណ្ណោះ។
ឥឡូវចូលមកដល់ FA Cup ដែលទើបតែយកឈ្នះ Man City កាលពីវគ្គ ៤ ក្រុម ក៏កំណត់ឲ្យ Liverpool ត្រូវឡើងមកប៉ះ Chelsea ជាថ្មី ដែលបានយកឈ្នះ Crystal Palace នៅយប់មិញ។ កាលបរិច្ឆេទប្រកួត គឺនៅថ្ងៃទី ១៤ ឧសភា លេងនៅទឹកដីកណ្តាល នៃកីឡដ្ឋាន Wembley មានផ្សាយផ្ទាល់លើទំព័រ CTS Sports។ ពានរង្វាន់ស្ថិតក្រោមការគ្រប់គ្រងរបស់សមាគមបាល់ទាត់អង់គ្លេសមួយនេះ បើ Liverpool ឈ្នះ នោះនឹងទទួលបានប្រាក់ ១,៨ លានផោន។
បន្តទៅយុទ្ធនាការនៃក្របខ័ណ្ឌ Premier League ដែលឈានមកដល់ជុំទី ៣១ ហង្សកំពុងស្ថិតនៅចំណាត់ថ្នាក់ទី ២ ចាញ់គម្លាត ១ ពិន្ទុធៀបនឹងក្រុមកំពូលតារាង Man City។ នៅសេសសល់ ៧ ជុំទៀត ដូច្នេះឱកាសនៃការប្រជែងយកពានលីគកំពូលអង់គ្លេស ក៏នឹងមានខ្ពស់ទៅតាមនោះដែរ ជាពិសេសប្រសិនណា City ហ៊ានតែភ្លាត់ស្នៀតនៅប្រកួតណាមួយ ហើយ Liverpool អាចបន្តទម្រង់លេងដូចពេលបច្ចុប្បន្ន។ ហង្សឈ្នះពាន PL លើកចុងក្រោយ នៅឆ្នាំ ២០២០ ហើយបើរដូវកាលនេះ អាចគ្រងជើងឯកទៀតនោះ ប្រាក់រង្វាន់នឹងទទួលបានប្រហែល ១៥០ លានផោន។
ចុងក្រោយគឺពានរង្វាន់អឺរ៉ុប UEFA Champions League ដែលក្រុមមានមូលដ្ឋានក្នុងទីក្រុង Merseyside បានយកឈ្នះទៅលើ Benfica ហើយឆ្ពោះមកដល់វគ្គ ៤ ក្រុមចុងក្រោយ។ ក្រុមសេសសល់ មានអង់គ្លេស ២ គឺ City, Liverpool និងនៅអេស្ប៉ាញ ២ គឺ Real Madrid និង Villarreal។ វគ្គពាក់កណ្តាលផ្តាច់ព្រ័ត្រ ហង្សកំណត់ជួបនាវាលឿង Villarreal ស្របពេលដែលមេឃខៀវ ត្រូវជួបអធិរាជស Real Madrid។
ប្រសិនអាចបន្តដំណើរឆ្ពោះទៅវគ្គផ្ដាច់ព្រ័ត្រ កំណត់លេងនៅចុងខែឧសភា ហើយក្លាយជាម្ចាស់ជើងឯកជាថ្មី ក្រោយខកខានកាលពីឆ្នាំ ២០១៩ នោះ Liverpool នឹងទទួលបានប្រាក់រង្វាន់ប្រមាណ ៦០ លានផោន នេះបើយើងរាប់ទាំងលទ្ធផលតាំងពីវគ្គចែកពូល មកទល់វគ្គចុងក្រោយ។ ដូច្នេះសរុបប្រាក់រង្វាន់នៃពាន ៤ នៅរដូវកាលតែមួយសម្រាប់ហង្ស គឺអាចឡើងដល់ជិត ២១២ លានផោន។ អ៊ីចឹងចាំមើល តើ Liverpool នឹងកើបពានម្តងទាំង ៤ ឬបន្សល់ពានណាខ្លះទុកឲ្យក្លឹបដទៃ?
ប្រភព៖ បរទេស