ក្លឹប Barcelona បានហក់មកលេខ ២ នៅតារាង La Liga បន្ទាប់យកឈ្នះទៅលើ Sevilla តាមរយៈលទ្ធផល ១-០។ នោះកើតឡើងចេញពីគ្រាប់បាល់របស់ខ្សែបម្រើវ័យក្មេង Pedri ដែលស៊ុតបាល់ Solo Goal បានយ៉ាងល្អ មុនចប់ការប្រកួត ២០ នាទីចុងក្រោយ។
យុវជនវ័យ ១៩ ឆ្នាំ បានកិបអស់ចង្កេះកីឡាករ Sevilla ២ រូប មុនស៊ុតបាល់រ៉ាផុតដៃអ្នកចាំទីយ៉ាងស្អាត ទៅជ្រុងម្ខាង តាមរយៈការស៊ុតក្រៅប្រអប់ថែមទៀតផង។ ជុំវិញគ្រាប់បាល់នេះ ក៏ត្រូវបានកីឡាករអេស្ប៉ាញ និយាយ៖ “ខ្ញុំគិតថាវាស្រដៀងនឹងគ្រាប់បាល់ ដែលស៊ុតកាលនៅទឹកដីទួរគី [ទល់ក្លឹប Galatasaray] ដោយពេលខ្ញុំឃើញការព្យាយាមឈូស គឺខ្ញុំអូសបាល់ផុត ហើយពេលយារជើងស៊ុតបាល់ គឺដឹងមុនហើយ ថាវានឹងចូលទី”។
គេបន្តថា៖ “ខ្ញុំពិតជារីករាយណាស់ ហើយស្រលាញ់គ្រាប់បាល់នេះជាខ្លាំង ដោយអ្នកគាំទ្រ Barca គឺជាអ្នកគាំទ្រដ៏ល្អបំផុតក្នុងលោក”។ គួររំឭកថា សូម្បីតែអ្នកចាត់ការលោក Xavi Hernandez ក៏មានការសាទរខ្លាំងដែរ ដល់ថ្នាក់និយាយថា Pedri គ្មាននរណាអាចប្រដូចបានឡើយ បើនិយាយអំពីសមត្ថភាព និងកត្តាអាយុរបស់គេសព្វថ្ងៃ៕
ទស្សនាវីដេអូខាងក្រោម៖
https://youtu.be/BOnqRS-zwIs
ប្រភព៖ Football-Espana