ការប្រៀបធៀបរវាង Cristiano Ronaldo និង Lionel Messi គឺគ្មានទេ ពាក្យថា បញ្ចប់ ហើយថ្មីៗនេះ អតីតជើងចាស់លោក Paulo Di Canio ក៏បានចេញមកបង្ហាញការយល់ឃើញវិញម្តង ដោយចម្លើយរបស់លោក គឺជ្រើសយកតារាឆ្នើមសញ្ជាតិព័រទុយហ្គាល់។
និយាយពីស្ថានភាពចុងក្រោយ Ronaldo ដែលត្រូវបានអ្នកគាំទ្ររិះគន់មិនបានចូលលេងទល់ Man City បែរជាមករកបាន Hat-trick សម្ញែងសាច់ដុំសងភ្លាមៗ នៅការប្រកួតបន្ទាប់ទល់ Tottenham Hotspur។ រីឯ Messi ក្រៅពីធ្វើមិនបានល្អ នៅបរាជ័យទល់ Real Madrid នៅ UCL ហើយ មកដល់ប្រកួតបន្ទាប់ ក៏មិនបានបង្កើតផ្លែផ្កាអ្វីគួរឲ្យចាប់អារម្មណ៍ដែរ និងបែរជាទទួលសំឡេងស្រែកចំអកពីអ្នកគាំទ្រក្នុងកីឡដ្ឋាន PSG ថែមទៀត។
លោក Paulo និយាយប្រាប់ Sky Sports បែបនេះ៖ “Messi គេគ្មានអារម្មណ៍ទេ យើងនិយាយអំពី Cristiano Ronaldo ចំពោះគេ បើសួរថា ព្រមអង្គុយបម្រុងទល់ Man City ឬអត់ គេនឹងអត់ទៅចូលរួមទេ ហើយគេសុខចិត្តហោះទៅព័រទុយហ្គាល់ គេសម្រាក ហើយត្រលប់មកវិញ គេរកបាន Hat-trick”។
លោកសង្កត់ធ្ងន់៖ “ដូច្នេះរវាងអ្នកទាំងពីរ បើមិននិយាយពីទេពកោសល្យ ខ្ញុំសូមជ្រើសយកមនុស្សធម្មតាដូចជា Ronaldo ហើយ ដែលគេមានព្រលឹង មានបេះដូង មានអារម្មណ៍ចេះឈឺចាប់ ខុសពី Messi មិនថាតែនៅជម្រើសជាតិ ហើយទោះបីពេលនេះ គេទទួលសំឡេងចំអកពីអ្នកគាំទ្រ ក៏កាយវិការរបស់គេមិនផ្លាស់ប្តូរដដែល គេជាមនុស្សក្រៅភពដែលគ្មានបេះដូង”៕
ប្រភព៖ BeSoccer