ក្លឹបសារិកាព្រៃ Newcastle United ត្រូវបានគេរាយការណ៍ថា កំពុងចាប់អារម្មណ៍ក្នុងការចង់នាំយកខ្សែបម្រើនៃក្លឹប Marseille គឺកីឡាករ Boubacar Kamara នៅទីផ្សារដោះដូររដូវក្តៅខាងមុខ។ សម្រាប់បុរសវ័យ ២៣ ឆ្នាំ រាប់បានជាចំណែកសំខាន់របស់ក្លឹបខាងលើ ដោយរដូវកាល ២០២១/២២ គេបង្ហាញខ្លួនសរុប ៣២ ប្រកួត រកបាន ១ គ្រាប់។
បើតាមសារព័ត៌មាន The Northern Echo ចុះផ្សាយ ក្លឹប Newcastle ឆ្លៀតពេលឃើញ កុងត្រារបស់ Kamara កៀកនឹងផុត ហើយទទួលដំណឹងថាកីឡាករច្រានចោលសំណើបន្តកុងត្រាថ្មីផង ដូច្នេះក៏ចង់សាកល្បងចូលចរចា ដើម្បីថ្ពក់យកគេ មកពង្រឹងតំបន់កណ្តាលរបស់ខ្លួន។
សុពលភាពកុងត្រារបស់គេ នឹងត្រូវផុតនៅចុងខែមិថុនា ខាងមុខ ដែលមានន័យថា ក្លឹបអង់គ្លេសនឹងមិនទាមទារឲ្យចំណាយលើតម្លៃផ្ទេរចូលសូម្បីតែមួយសេន្ត ពោលស៊ីសងគ្នាតែលើថ្លៃពលកម្មមួយមុខគត់។ ក្រៅពី Newcastle កាលពីមួយរយៈមុន ក៏ធ្លាប់លឺថាមានក្លឹប Man Utd, West Ham និង Crystal Palace ផ្សេងទៀតដែរ បានចាប់អារម្មណ៍ទៅលើកីឡាករសញ្ជាតិបារាំង៕
ប្រភព៖ The Northern Echo