ក្លឹបបារាំង Paris Saint-Germain បានបញ្ចប់លទ្ធផលយកឈ្នះទៅលើក្លឹបអេស្ប៉ាញ Real Madrid ១-០ សម្រាប់ការប្រកួតជើងទី ១ វគ្គ ១៦ ក្រុមនៅឯកីឡដ្ឋាន Parc des Prince ក្នុងទីក្រុងប៉ារីស កាលពីមុននេះបន្តិច។
ស្ថិតការប្រកួតរវាងក្រុមទាំងពីរ គឺម្ចាស់ផ្ទះលេងគ្របជិតឈឹង តាំងតែពីដើមតង់ទី ១ មកដល់បញ្ចប់ការប្រកួត ជាមួយការគ្រប់គ្រងបាល់ ៥៨ ភាគរយ ស៊ុត ២១ លើក ចំគោលដៅ ៨ លើក ធៀបនឹងក្រុមភ្ញៀវ គ្រប់គ្រងតែ ៤២ ភាគរយ ស៊ុត ៣ លើក ចំគោលដៅ ០ លើក។ គ្រាប់បាល់នាំមុខប៊ិះតែនឹងកើតឡើងនៅនាទី ៦២ តាមរយៈការស៊ុតបាល់ ១១ ម៉ែត្ររបស់ Lionel Messi ប៉ុន្តែត្រូវសង្រ្គោះបានដោយជោគជ័យ ពីសំណាក់អ្នកចាំទីដៃស្អិត Thibaut Courtois។
PSG ព្យាយាមមួយសារហើយមួយសារទៀត រហូតដល់នាទី ៩៤ កៀកនឹងបញ្ចប់ការប្រកួតទៅហើយ ស្រាប់តែ Neymar បានប៉ែងបាល់បញ្ជូនទៅឲ្យយុវជនឆ្នើម Mbappe ហើយកីឡាករបារាំង រត់ជ្រែកចូលផុតកីឡាករ ៣ រូប មុនស៊ុតផុតដៃអ្នកចាំទី រកបានមួយគ្រាប់ដោយជោគជ័យ៕
ទស្សនាវីដេអូខាងក្រោម៖