នៅសល់តែរយៈពេល ២ ថ្ងៃទៀតប៉ុណ្ណោះ ការទន្ទឹងរង់ចាំរបស់បងប្អូនអ្នកគាំទ្រវិស័យបាល់ទាត់ ក៏នឹងឈានចូលមកដល់ នោះគឺជាជំនួបពិសេស ការប៉ះគ្នារវាងក្លឹបសេដ្ឋីបារាំង Paris Saint-Germain និងក្លឹបអធិរាជស Real Madrid នៅឯប្រកួតវគ្គ ១៦ ក្រុម UEFA Champions League។ ការប្រកួត នឹងធ្វើឡើងនៅវេលាម៉ោង ០៣:០០ នាទីទាបភ្លឺ ឈានចូលថ្ងៃពុធ ទី ១៦ កុម្ភៈ មានផ្សាយផ្ទាល់លើទំព័រ CTS Sports។
មុនឈានដល់ការប្រកួត យើងងាកមកមើលការលើកឡើងរបស់អតីតកីឡាករជើងចាស់ ២ រូប ដោយទស្សន៍ទាយខុសគ្នា ជុំវិញលទ្ធផលដែលនឹងអាចកើតឡើងរវាងក្រុមទាំងពីរ។ សម្រាប់អតីតខ្សែការពារសញ្ជាតិបារាំង Lilian Thuram បាននិយាយថា PSG នឹងឈ្នះការប្រកួតសារនេះ ក៏ដោយសារតែមានវត្តមានកីឡាករកំពូលទាំង ៣ សហការគ្នា មាន Lionel Messi, Kylian Mbappe និង Neymar Jr។
នៅបទសម្ភាសន៍ប្រាប់សារព័ត៌មាន MARCA លោក Thuram និយាយ៖ “ប្រសិនឲ្យខ្ញុំជ្រើស ថាក្រុមណាដែលនឹងឈ្នះការប្រកួត នោះខ្ញុំគិតថា ជា PSG ព្រោះពិតណាស់ ការដែលក្រុមរបស់យើង មាន Messi Neymar និង Mbappe លេងរួមគ្នា នោះគឺមិនងាយនឹងបរាជ័យឡើយ ព្រោះពួកគេជាកីឡាករល្អបំផុតក្នុងលោក”។
លោកបន្ត៖ “បន្ថែមពីនេះ យើងក៏មានអ្នកចាំទីដ៏ល្អបំផុតមួយផងដែរ ក៏ដូចជាខ្សែការពារកណ្តាលលំដាប់ពិភពលោក Marquinhos ដូចគ្នាទៅនឹង Kimpembe អ៊ីចឹងហើយ ខ្ញុំយល់ឃើញថា PSG នឹងឈ្នះការប្រកួតនេះ”។
ដោយឡែកងាកមកអតីតខ្សែប្រយុទ្ធនៃក្លឹបខាងលើទាំងពីរ គឺ Nicolas Anelka ក៏បានបង្ហើបប្រាប់ ថាមិនមែន PSG ទេ តែគឺជា Real Madrid ដែលសង្ឃឹមខ្ពស់ជាង ព្រោះអីពួកគេជាក្រុមមានបទពិសោធន៍ជោកជាំនៅពានអឺរ៉ុប។
នៅបទសម្ភាសន៍ជាមួយ MARCA អតីតកីឡាករជម្រើសជាតិបារាំងនិយាយ៖ “នេះវាប្រៀបដូចជាការប្រកួតវគ្គផ្ដាច់ព្រ័ត្រមួយអ៊ីចឹងដែរ ដោយក្រុមខ្លាំងទាំងពីរត្រូវប៉ះគ្នា តែខ្ញុំសុំឲ្យ Madrid ជាក្រុមមានប្រៀបជាង ព្រោះពួកគេមានបទពិសោធន៍ច្រើនជាង និងតែងតែរឹងមាំនៅការប្រកួត UCL រីឯ PSG ពួកគេក៏មានកីឡាករលេចធ្លោ ដូច្នេះក៏រាប់ថា អាចមានសង្ឃឹមទទួលបានលទ្ធផលល្អផងដែរ”។
គួរបញ្ជាក់ថា ស្ថិតិធ្លាប់ប៉ះគ្នារវាងក្រុមទាំងពីរ គឺកើតឡើង ៦ ប្រកួត ដោយក្រុមឈ្នះជើងឯក ១៣ សម័យកាល R.Madrid ទទួលបានជ័យជម្នះ ៣ លើក ស្មើ ២ លើក និងចាញ់ ១ លើក។ រីឯគ្រាប់បាល់កើតឡើងសរុប គឺ ១៥ គ្រាប់ ខាង Real រកបាន ៨ និងខាង PSG រកបាន ៧។ ការជួបគ្នាលើកចុងក្រោយ នៅវគ្គចែកពូល រដូវកាល ២០១៩/២០ សរុបទាំងពីរជើង PSG យកឈ្នះ ៥-២។
ដោយឡែកសម្រាប់ការប្រកួតសារនេះដែរ អាជ្ញាកណ្តាលលើទីលាន គឺជាលោក Daniele Orsato ដោយបុរសវ័យ ៤៦ ឆ្នាំ សញ្ជាតិអ៊ីតាលី ក៏ធ្លាប់ជាអាជ្ញាកណ្តាលកាត់សេចក្តីនៅបរាជ័យ ដែល PSG ចាញ់ Bayern នាវគ្គផ្តាច់ព្រ័ត្រ ឆ្នាំ ២០២០ និងវគ្គ ៤ ក្រុមចុងក្រោយ ដែល Real Madrid ចាញ់ Chelsea កាលពីឆ្នាំ ២០២១៕
ប្រភព៖ បរទេស