៥ កុម្ភៈ ឆ្នាំ ២០២២ គឺជាថ្ងៃដែលរំកិលអាយុ Cristiano Ronaldo ឡើងមួយលេខទៀតហើយ ពោលឈានចូលអាយុ ៣៧ ឆ្នាំ។ បើទោះបីជាវ័យកាន់តែចំណាស់ ប៉ុន្តែទំហំនៃការស្រលាញ់គាំទ្រ សម្រាប់តារាឆ្នើមសញ្ជាតិព័រទុយហ្គាល់ ក៏នៅតែបន្តមានឥតឈប់។
ងាកមកក្នុងអត្ថបទនេះ CTS Sports សូមជីកកកាយលើកមកបង្ហាញនូវការពិត និងអាថ៌កំបាំង ៣ យ៉ាង ពីខ្សែប្រយុទ្ធនៃក្លឹប Man Utd ដែលជឿថា ទោះអ្នកជាអ្នកគាំទ្រកាន់ឆ្នាំ ក៏មិនប្រាកដថា ធ្លាប់បានដឹងទាំងអស់នោះដែរ៖
៣) Ronaldo ធ្លាប់ដើរសុំអាហារគេហូប
មុនក្លាយជាសេដ្ឋីលុយវាល់លានដូចពេលបច្ចុប្បន្ន បង្វែរទៅអតីតកាល CR7 គឺត្រឹមតែជាក្មេងក្រខ្សត់ម្នាក់ ដែលមានក្តីស្រមៃចង់ក្លាយជាកីឡាករបាល់ទាត់។ កំឡុងពេលគ្រួសារលោកក្រលំបាកខ្លាំង Ronaldo ធ្លាប់ដើរសុំអាហារគេហូប ហើយមានពេលមួយនោះ បុគ្គលិកបម្រើការនៅហាង McDonald’s បានផ្តល់អាហារឥតគិតថ្លៃមួយពេល សម្រាប់ Ronaldo រួចបានធ្វើឲ្យលោកចងចាំទល់សព្វថ្ងៃ។
នៅបទសម្ភាសន៍មួយ អតីតកីឡាករនៅក្លឹប R.Madrid និយាយ៖ “ពេលមួយនោះយើងឃ្លានខ្លាំងណាស់ ហើយនៅមុខកីឡដ្ឋាន មានហាង McDonald’s ដោយខ្ញុំបានទៅគោះទ្វារ រួចសុំបឺហ្គឺរគេហូប ដោយខ្ញុំចាំថា មានស្រ្តីម្នាក់ឈ្មោះ Edna និងក្មេងស្រីពីរនាក់ឯទៀត ដែលបានផ្តល់អាហារមកឲ្យខ្ញុំ”។
២) ជួបស្នេហ៍ពិត នៅហាងលក់សំលៀកបំពាក់
គូស្នេហ៍មុនៗ Ronaldo មិនដែលរក្សាទំនាក់ទំនងឲ្យលើសពី ៣ ឆ្នាំនោះទេ តែមកដល់ជាមួយ Georgina Rodriguez គិតមកទល់ពេលនេះ គឺឆ្លងកាត់រយៈពេលជាង ៥ ឆ្នាំហើយ។ គ្រប់គ្នាជឿថា តារាម៉ូដែលស្រីកូនកាត់អាហ្សង់ទីន-អេស្ប៉ាញ គឺពិតជានារីចុងក្រោយក្នុងជីវិតរបស់ Ronaldo។
ដើមចមនៃការបង្កាត់ភ្លើងស្នេហ៍រវាង Ronaldo និង Georgina គឺកើតឡើង នៅពេលដែល Georgina បម្រើការជាបុគ្គលិកផ្នែកលក់នៅហាង Gucci ក្នុងទីក្រុង Madrid ប្រទេសអេស្ប៉ាញ ហើយពេលអ្នកទាំងពីរបានជួបគ្នាភ្លាម និស្ស័យស្នេហ៍ហាក់បញ្ឆេះឡើងភ្លែត រហូតដល់ទាក់ទង ក្លាយជាចំណង បង្កើតបានកូនស្រីមួយដល់សព្វថ្ងៃ។
១) មូលហេតុមិនទទួលទានស្រា
មិនមែនគិតពីរឿងសុខភាពជាធំនោះទេ តែមូលហេតុចម្បង ដែល Ronaldo មិនទទួលទានស្រា គឺដោយសារសុរានេះឯង បានឆក់យកជីវិតឪពុករបស់លោក ត្រឹមអាយុ ៥២ ឆ្នាំ ជាពេលវេលាដែល Ronaldo កំពុងតែបណ្ដុះភាពជោគជ័យ។
ចាប់តាំងពីពេលបាត់បង់ឪពុក អតីតកីឡាករនៅក្លឹប Sporting ក៏បានសន្យានឹងខ្លួនឯង ដោយមិនប៉ះសុរាដាច់ខាត។ គួបផ្សំនឹងការប្រកាន់ខ្ជាប់គោលជំហរនេះ ក៏បានជួយឲ្យកាយសម្បទាកីឡាករវ័យ ៣៧ ឆ្នាំ មើលទៅនៅតែក្មេង ដូចយុវជនស្រករ ២០៕
ប្រភព៖ បរទេស