ក្លឹបកាំភ្លើងធំ Arsenal ទីបំផុតបានឈានដល់កិច្ចព្រមព្រៀង បញ្ចប់កុងត្រាមុនកាលកំណត់រវាងភាគីកីឡាករ Pierre-Emerick Aubameyang ហើយកីឡាករក៏បានចាកចេញពីក្លឹបរួចហើយដែរ និងបានទៅចុះហត្ថលេខាឲ្យក្លឹបថ្មី Barcelona សម្រាប់លក្ខខណ្ឌផ្ទេរឥតតម្លៃខ្លួន។
ខ្សែប្រយុទ្ធវ័យ ៣២ ឆ្នាំ បានទៅដល់ទឹកដីអេស្ប៉ាញតាំងពីថ្ងៃចន្ទ ហើយបើទោះបីផុតកាលបរិច្ឆេទទីផ្សារដោះដូរ តែដោយសារក្នុងនាមជាកីឡាករឥតតម្លៃខ្លួន ដូច្នេះគេអាចផ្ទេរ ហួសថ្ងៃកំណត់បាន។ តាមការប្រកាសរបស់ក្លឹប Arsenal បានឲ្យដឹងថា៖ “Pierre-Emerick Aubameyang បានចាកចេញពីក្លឹប នៅកិច្ចព្រមព្រៀងបញ្ចប់កុងត្រាមុនកាលកំណត់ យើងជូនពរឲ្យគេជួបតែរឿងល្អនៅជំហានបន្ទាប់ក្នុងអាជីព ហើយក៏អរគុណពេលវេលាកន្លងមកដែលគេលះបង់មកឲ្យក្លឹប”។
បញ្ជាក់ថា ការចាកចេញរបស់ កីឡាករហ្គាបុងសារនេះ ក៏រាប់បានជាការសម្រាលបន្ទុកចំណាយមួយផ្នែកធំ ឲ្យ Arsenal ផងដែរ ព្រោះអីក្លឹបចាយច្រើនណាស់លើថ្លៃពលកម្ម ដល់ទៅ ២៥០ ០០០ ផោន/សប្តាហ៍។ ស្ថិតិមកចូលរួម ១៦៥ ប្រកួត គេរកបាន ៩២ គ្រាប់ ពោលឈរជើងជិត ៤ ឆ្នាំពេញឲ្យ Arsenal ក្រោយចាកចេញពី Dortmund កាលពីឆ្នាំ ២០១៨៕
ប្រភព៖ BeSoccer