ការរកបាន Hat-trick ឬសំដៅដល់ការរកបាន ៣ គ្រាប់នៅការប្រកួតទោល មិនថាតាមរយៈការស៊ុតដោយប្រើជើង ឬការប្រើក្បាលតែតបញ្ចូលទី ជាទូទៅ គឺវារមែងជារឿងពិបាកសម្រាប់កីឡាករ ហើយវាកាន់តែពិបាក បើប្រកួតនោះ ស្ថិតនៅក្របខ័ណ្ឌដែលមានការប្រកួតប្រជែងខ្ពស់ដូចជា Premier League។
យ៉ាងណាងាកមកក្នុងអត្ថបទនេះ CTS Sports សូមលើកមកបង្ហាញនូវកំណត់ត្រាគួរឲ្យចាប់អារម្មណ៍ ៥ ជុំវិញកីឡាកររកបានគ្រាប់បាល់ Hat-trick នៅលីគកំពូលអង់គ្លេស ដោយចាយពេលជាប់ៗគ្នាតិចបំផុតលើទីលាន ខណៈអ្នកចុងក្រោយចំណាយពេលមិនដល់ ៣ នាទីផង៖
៥) Sergio Aguero
កីឡាករចូលនិវត្ត Aguero អតីតកាលគេធ្លាប់បម្រើអាជីពឲ្យក្លឹប Manchester City ហើយក៏បានក្លាយជា Top Scorer លំដាប់ទី ១ នៅទីនោះផងដែរ។
ត្រលប់ទៅឆ្នាំ ២០១៥ នៅប្រកួតមួយទល់ Newcastle United កីឡាករអាហ្សង់ទីន បានបង្ហាញទម្រង់លេងយ៉ាងល្អ ដោយរកបាន ៥ គ្រាប់ម្នាក់ឯង នាំឲ្យលទ្ធផលបញ្ចប់ ៩០ នាទី City យកឈ្នះ ៦-១ នៅកីឡដ្ឋាន Etihad។ Aguero គេរកបានគ្រាប់បាល់នៅនាទី ៤២ ហើយដល់នាទី ៤៩ និង ៥០ ក៏បន្ថែមពីរគ្រាប់ទៀត ដែលមានន័យថាត្រឹមចន្លោះពេល ៨ នាទី គេអាចករបានដល់ទៅ ៣ គ្រាប់ម្នាក់ឯង។
៤) Gabriel Agbonlahor
នៅខែសីហា ឆ្នាំ ២០០៨ ក្លឹប Aston Villa បានយកឈ្នះ ៤-២ ទៅលើ Man City ហើយកើតមានគ្រាប់បាល់ Hat-trick ចេញពីកីឡាករ Agbonlahor នៅចន្លោះនាទី ៦៩, ៧៤ និង ៧៦ ពោលខ្សែប្រយុទ្ធសញ្ជាតិអង់គ្លេស ចាយពេល ៧ នាទី និង ១០ វិនាទី។
៣) Jermaine Defoe
បានកើតមានលទ្ធផលភ្ញាក់ផ្អើល នៅខែវិច្ឆិកា ឆ្នាំ ២០០៩ ដែលក្លឹបមាន់ខ្នាយមាស Tottenham Hotspur បានលុតយ៉ាងចាស់ដៃ ក្រោមលទ្ធផល ៩-១ ទៅលើ Wigan Athletic។ Defoe គឺជាកីឡាករលេចធ្លោក្នុងប្រកួតនោះ បន្ទាប់ពីរកបានដល់ទៅ ៥ គ្រាប់ម្នាក់ឯង។
ប៉ុន្តែបើនិយាយពីគ្រាប់បាល់ Hat-trick គឺកើតឡើងនៅនាទី ៥១, ៥៤ និង ៥៨ ដែលចាយពេល ៧ នាទីត្រឹម។
២) Robbie Fowler
នៅការប្រកួតរវាង Liverpool និង Arsenal កាលពីឆ្នាំ ១៩៩៤ ខ្សែប្រយុទ្ធជួរមុខទាំង ៣ របស់ហង្ស មាន Ian Rush, John Barnes និង Robbie Fowler ល្មមក្រឡុកឲ្យប្រព័ន្ធការពារកាំភ្លើងធំ តាមបិទយ៉ាងវក់វី។
តែយ៉ាងណា គ្រាប់បាល់ Hat-trick ៣ គ្រាប់ទៅលើ Arsrenal នៅតែកើតឡើងបាន ចេញពីថ្វីជើងរបស់ Fowler នៅនាទី ២៦, ២៩ និង ៣១ ពោលប្រើពេលជាប់ៗគ្នា ត្រឹម ៤ នាទី និង ៣៣ វិនាទីប៉ុណ្ណោះ។
១) Sadio Mane
កំណត់ត្រាចាស់នៅឆ្នាំ ១៩៩៦ ទីបំផុតបានរកឃើញអ្នកថ្មី អាចបំបែកបាននៅឆ្នាំ ២០១៥ គ្រាដែលខ្សែប្រយុទ្ធសេណេហ្គាល់ នៅឈរជើងឲ្យក្លឹប Southampton។
គ្រានោះ Mane រកបានគ្រាប់បាល់នៅនាទី ១៣, ១៤ និង ១៦ ដែលប្រើពេលត្រឹម ២ នាទី និង ៥៦ វិនាទី ដែលយកឈ្នះកំណត់ត្រារបស់ Fowler ចំនួន ៩៧ វិនាទី។ លទ្ធផលបញ្ចប់ការប្រកួតពេលនោះ Southampton យកឈ្នះ ៦-១ ទៅលើ Aston Villa៕
ប្រភព៖ Sportskeeda