នៅពេលចុងក្រោយ ជឿថាអ្នកគាំទ្រ Barcelona ប្រហែលជាចាប់អារម្មណ៍ខ្លាំង ទៅលើគុណភាពរបស់កីឡាករវ័យក្មេង Gavi ដែលគេលេងតំណែងបម្រើ ហើយមានវ័យទើបតែ ១៧ ឆ្នាំប៉ុណ្ណោះ។ យ៉ាងណារឿងហួសចិត្តមួយ គឺរៀងរាល់ការប្រកួត កីឡាករអេស្ប៉ាញ មិនដែលឃើញចងខ្សែស្បែកជើងឲ្យស្រួលបួលទេ។ តើនេះវាជាទម្លាប់ ឬមានអ្វីពិសេសនៅពីក្រោយនោះ?
បើតាមការបញ្ជាក់ពីអ្នកចាត់ការអេស្ប៉ាញ លោក Xavi Hernandez ក៏បានបង្ហើបថា៖ “សម្រាប់ Gavi គេលេងបាល់ ទាំងមិនចងខ្សែស្បែកជើងបែបហ្នឹង តាំងតែពីក្មេងមកម្ល៉េះ ហើយហេតុផលគឺសាមញ្ញទេ ត្រង់ថា គេអត់ចេះចងខ្សែស្បែកជើង ហើយបើចងក៏អត់ត្រូវស្តង់ដារដូចគេឯទៀតដែរ អ៊ីចឹងវាងាយនឹងរបូតទៅវិញ ដូច្នេះហើយគេក៏មិនខ្វល់ រួចបន្តលេងរបៀបហ្នឹងរហូតមក”។
ជុំវិញរឿងរ៉ាវនេះដែរ មតិខ្លះក៏ហួសចិត្ត ហើយមតិខ្លះទៀត ក៏លើកឡើងថា វាជារឿងសាមញ្ញ ព្រោះ Gavi ជាក្មេងដ៏គួរឲ្យស្រលាញ់មួយក្នុងពិភពបាល់ទាត់។ តែយ៉ាងណាកន្លងទៅ មិត្តរួមក្រុម Nico Gonzalez ដែលមានវ័យ ២០ ឆ្នាំ ក៏បានបង្ហោះបែបលេងសើចនិងហួសចិត្ត អមជាមួយរូប ដែលខ្លួនទៅឱនចងខ្សែស្បែកជើងឲ្យ Gavi ហើយសរសេរថា៖ “ដល់ពេលដែលឯងត្រូវរៀនចងខ្សែស្បែកជើងដោយខ្លួនឯងហើយ”។
គួររំឭកថា កីឡាករប្រើប្រាស់អាវលេខ ៣០ ខាងលើ សេសសល់សុពលភាពកុងត្រាជាមួយអ្នកមានបុណ្យដល់ចុងខែមិថុនា ឆ្នាំ ២០២៣ ហើយជាមួយស្ថិតិបង្ហាញខ្លួន ២៥ ប្រកួត រដូវកាលនេះ គេក៏រកបាន ១ គ្រាប់និង Assist ៣ លើកផងដែរ។
កន្លងទៅក៏មានចចាមអារ៉ាមចុះផ្សាយថា ក្លឹប Barcelona កំពុងរៀបចំ នឹងផ្តល់កុងត្រាថ្មីរយៈពេល ៥ ឆ្នាំ ដើម្បីដំឡើងថ្លៃពលកម្មឲ្យគេ ក៏ដូចជាដកចោលនូវតម្លៃផ្តាច់កុងត្រាចាស់ ៥០ លានអឺរ៉ូ។ ប្រសិនណាការចរចាកុងត្រាថ្មីមិនសម្រេច នោះ Gavi អាចនឹងផ្ទេរទៅក្លឹបនៅអង់គ្លេស ដោយមានដូចជា Liverpool ហ៊ានឲ្យយុវជនវ័យ ១៧ ឆ្នាំ នៅថ្លៃពលកម្មល្បាក់ជិត ៨០ ០០០ អឺរ៉ូឯណោះ។
ស្រដៀងនឹងរឿងរ៉ាវរបស់ Gavi ដែរ អតីតកាលក៏ធ្លាប់មានអតីតវីរបុរសឆ្នើម លោក Diego Maradona ជាកីឡាករ រមែងហ្វឹកហាត់បាល់ និងប្រកួត ដោយមិនចងខ្សែស្បែកជើងដូចគ្នា។ តែយ៉ាងណាហេតុផលរបស់វីរបុរសអាហ្សង់ទីនគឺផ្សេងគ្នា ដោយមិនមែនលោកមិនចេះចងខ្សែស្បែកជើងទេ តែផ្ទុយទៅវិញ លោកគិតថា ការដែលមិនចងខ្សែស្បែកជើង គឺវាស្រួលលេងជាង ដោយមានអារម្មណ៍ស្និទ្ធជាមួយបាល់ តែភាគច្រើនលោកធ្វើបែបហ្នឹងតែពេលហ្វឹកហាត់ប៉ុណ្ណោះ រួចដល់ពេលវេលាប្រកួតផ្លូវការ គឺលោកចងខ្សែជាធម្មតា៕
ប្រភព៖ SportBible