ទំព័រឆ្នាំ ២០២១ នៅសល់តែរយៈពេល ៣ ថ្ងៃទៀតប៉ុណ្ណោះ មុនត្រូវបើកក្បាលទំព័រ ស្វាគមន៍ឆ្នាំថ្មី ២០២២ ហើយសម្រាប់ពិភពបាល់ទាត់ កន្លងទៅរយៈពេលមួយឆ្នាំពេញនេះ ក៏បានកើតមានរឿងរ៉ាវដ៏គួរឲ្យចាប់អារម្មណ៍ជាច្រើនផងដែរ។
ជាក់ស្តែងដូចរឿងកីឡាករចូលនិវត្ត ក៏មានតារាឆ្នើមខ្លះ តាមថាចិត្តរបស់គេមិនចង់នោះទេ តែកាលៈទេសៈបង្ខំ ខ្លះមកពីបញ្ហាសុខភាព និងបញ្ហាផ្ទាល់ខ្លួន ទើបសម្រេចឲ្យពួកគេប្រកាសព្យួរស្បែកជើងទាំងមិនទាន់អស់ចិត្តពីបាល់ទាត់។ តទៅនេះទំព័រ CTS Sports លើកឈ្មោះកីឡាករ ៤ រូបមកបង្ហាញឲ្យអ្នករាល់គ្នាបានដឹង៖
៤) Wayne Rooney
អតីតខ្សែប្រយុទ្ធដ៏មុតស្រួចនៅ Man Utd បានប្រកាសចូលនិវត្តពីអាជីពជាកីឡាករនៅថ្ងៃទី ១៥ មករា ឆ្នាំ ២០២១ ជាមួយការឈរជើងឲ្យក្លឹបចុងក្រោយ គឺ Derby County។ ស្ថិតនៅវ័យ ៣៦ ឆ្នាំ Rooney គិតថា ពេលវេលាជាកីឡាករគឺគ្រប់គ្រាន់ហើយសម្រាប់ខ្លួន រួចបានបោះជំហានមកក្លាយជាអ្នកចាត់ការ ដោយដឹកនាំ Derby លេង ២៥ ប្រកួត ឈ្នះ ៧ ស្មើ ១០ និងចាញ់ ៨។
ទៅមើលស្ថិតិកាលនៅជាកីឡាករ Rooney បានហែលកាត់ការលេងឲ្យក្លឹបធំៗដូចជា Man Utd, Everton និងធ្លាប់ទាំងលេងឲ្យក្លឹបនៅអាមេរិក D.C. United ផងដែរ។ នៅ ៨៨៧ ប្រកួត ទាំងក្លឹបបូកជម្រើសជាតិ គេរកបាន ៣៦៦ គ្រាប់។
៣) Sami Khedira
ធ្លាប់ជាកីឡាករកាន់ឆ្នាំនៅក្លឹប Real Madrid និង Juventus ហើយបានផ្ទេរទៅក្លឹបចុងក្រោយនៅទឹកដីកំណើត ប្រទេសអាល្លឺម៉ង់ គឺ Hertha BSC មុនប្រកាសចូលនិវត្ត កាលពីថ្ងៃទី ១ កក្កដាកន្លងទៅ នៅវ័យ ៣៤ ឆ្នាំ ។
អតីតខ្សែបម្រើរូបនេះ ក៏ធ្លាប់លើកពានរង្វាន់ធំៗដូចជា FIFA World Cucp, UEFA Champions League និងពានលីគកំពូលនៅឯអេស្ប៉ាញ អ៊ីតាលី ហើយសរុបការបង្ហាញខ្លួន ៥៥៩ ប្រកួត គេរកបាន ៥៧ គ្រាប់និង Assist ៥៩ លើក។
២) Arjen Robben
ប្រិយមិត្តអ្នកគាំទ្រ Bayern Munich ប្រាកដជាស្គាល់ច្បាស់ នៅកីឡាករលេងតំណែងប្រយុទ្ធស្លាបស្តាំ គឺ Robben។ តាមថាគេដូចចូលនិវត្តពីបាល់ទាត់ ២ ដង ដោយក្រោយចាកចេញពី Bayern គឺបានបាត់វត្តមានកីឡាករហូឡង់រយៈពេលជិត ១ ឆ្នាំ លុះមកដល់ខែកក្កដា ឆ្នាំ ២០២០ ក៏ត្រលប់មកលេងសារជាថ្មី ជាមួយក្លឹប Groningen នៅឯប្រទេសកំណើត។
យ៉ាងណាគេចូលរួមលេងបានតែប៉ុន្មានប្រកួតប៉ុណ្ណោះ ព្រោះជួបបញ្ហារបួស រួចឈរជើងនៅក្លឹបនោះបានមួយឆ្នាំ ក៏សម្រេចចូលនិវត្តតែម្តង នៅវ័យ ៣៧ ឆ្នាំ។
១) Sergio Aguero
ផ្ទេរមកក្លឹបថ្មី Barcelona ឈរជើងបានតែ ៥ ប្រកួត រកបាន ១ គ្រាប់ ជាការសោកស្តាយសម្រាប់ Aguero គេក៏បានជួបបញ្ហាសុខភាព នោះគឺជំងឺបេះដូង ដែលបង្ខំ ឲ្យគេត្រូវចូលនិវត្តទាំងមិនចិត្តទាន់ចង់ នៅវ័យទើបតែ ៣៣ ឆ្នាំ។
កីឡាករអាហ្សង់ទីនបានបង្ហាញខ្លួនលើកចុងក្រោយនៅការប្រកួតទល់ Alaves ដែលរត់បានតែជាង ៤០ នាទី គេក៏ដង្ហក់ខ្យល់ មានការឈឺចាប់ត្រង់ផ្នែកបេះដូង រួចសម្រេចដើរចេញពីទីលាន។ ឆ្លងកាត់ការវាយតម្លៃសុខភាពរយៈពេលជាង ១ ខែកន្លះ Aguero ក៏បានចេញមុខមកប្រកាស ទាំងទឹកភ្នែក កាលពីថ្ងៃទី ១៥ ធ្នូ ថាដំណើរនៃអាជីពបាល់ទាត់របស់លោក បានឈានមកដល់ទីបញ្ចប់ហើយ៕