ក្លឹបញញួរធំ West Ham United ត្រូវបានគេរាយការណ៍ថា កំពុងចូលខ្លួនប្រជែងជាមួយនឹងក្លឹបសារិកាព្រៃ Newcastle United ជុំវិញការចង់បាន ខ្សែបម្រើនៃក្លឹប Tottenham Hotspur គឺ Dele Alli។ ការចរចាចង់ធ្វើឲ្យសម្រេចទៅបាន ត្រឹមខែមករា ឬទីផ្សារដោះដូររដូវរងាខាងមុខ។
គួរឲ្យដឹងថា កីឡាករវ័យ ២៥ ឆ្នាំ ក្រោមការដឹកនាំរបស់លោក Antonio Conte គេហាក់មិនសូវទទួលបានឱកាសជាប់លាប់នោះទេ ដែលគេជឿថា Alli នឹងមិនស្ថិតក្នុងផែនការណ៍រយៈពេលយូរ របស់អ្នកចាត់ការសញ្ជាតិអ៊ីតាលីខាងលើឡើយ។ ចំពោះសាមីខ្លួនផ្ទាល់ក៏គេបើកភ្លើងខៀវ ទទួលយកសំណើពីក្លឹបដទៃដូចគ្នា ពោលស៊ីសងលើការចរចាសម្រេច ជាមួយភាគីក្លឹបអាណាព្យាបាលប៉ុណ្ណោះ។
បើតាមសារព័ត៌មាន Eurosport បានចុះផ្សាយថា West Ham និង Newcastle នេះ មិនមែនប្រជែងតែការចង់បាន Alli ម្នាក់ប៉ុណ្ណោះទេ ទៀតសោតក៏ចង់បាន Jesse Lingard ពីក្លឹប Man Utd ម្នាក់ទៀតផងដែរ។ យើងនឹងរង់ចាំមើលទាំងអស់គ្នា ថាតើសារនេះ ការប្រជែងយកខ្សែបម្រើ Alli រវាងក្លឹបណាមួយ ដែលអាចយកបាន ខណៈដែលហាងឆេងថ្លៃខ្លួនរបស់គេអាចថ្លៃល្បាក់ ២៥ លានផោន៕
ប្រភព៖ Eurosport