ដ្បិតបើសព្វថ្ងៃក្លឹប Barcelona កំពុងជួបនូវបញ្ហាធ្ងន់ធ្ងរ ពាក់ព័ន្ធនឹងផ្នែកហិរញ្ញវត្ថុ តែឱកាសក្នុងការប្រជែងយក Erling Haaland ខាងមុខ គឺក្លឹបមិនគិតថានឹងបោះបង់នោះទេ។ ផ្ទុយទៅវិញ អ្នកមានបុណ្យនឹងប្រើប្រាស់វិធីចុងក្រោយ គឺលក់ចេញកីឡាករសំខាន់ក្នុងក្រុម ដើម្បីយកលុយធំ ទៅចរចាយកកីឡាករន័រវេស។
បើតាមសារព័ត៌មាន ក្រៅស្រុកចុះផ្សាយថា ក្លឹបដឹកនាំដោយប្រធាន លោក Joan Laporta កំពុងលៃលកត្រៀមលក់ចេញ Frenkie de Jong ដោយជឿជាក់ថា នឹងអាចកើបលុយត្រលប់មកវិញ ក៏បានល្បាក់ ៩០ លានអឺរ៉ូផងដែរ។ បញ្ជាក់ថា កីឡាករហូឡង់ត្រូវបាន Barcelona ទិញយកកាលពីខែមករា ឆ្នាំ ២០១៩ ចេញពី Ajax នៅតម្លៃផ្ទេរ ៧៥ លានអឺរ៉ូ។
គួបផ្សំនឹងថ្លៃពលកម្មរបស់ De Jong ក្រាស់ក្រែលដល់ជាង ៣៥០ ០០០ ផោន/សប្តាហ៍ផង ដូច្នេះពិតជាពិបាកនឹងឲ្យ Barcelona រក្សាជើងគេបន្តទៅមុខទៀត។ ហេតុផលសំខាន់ ក៏ដោយសារ Barcelona ត្រូវការកីឡាករលេងតំណែងប្រយុទ្ធ មកជំនួស Sergio Aguero ជាចាំបាច់ផង ដូច្នេះបើយកបាន Haaland នោះនឹងក្លាយជាការជំនួសដ៏សក្តិសម។
រំឭកថា Haaland នឹងអាចមានតម្លៃផ្តាច់កុងត្រា ខ្ទង់ ៧៥ លានអឺរ៉ូ នៅរដូវក្តៅ ឆ្នាំ ២០២២ ខាងមុខ ហើយមិនមែនតែ Barcelona ទេ ដោយមានក្លឹបធំៗជាច្រើន ចាប់អារម្មណ៍មកលើកីឡាករវ័យ ២១ ឆ្នាំ តួយ៉ាង Man Utd, Chelsea, PSG, Real Madrid និង Juventus ជាដើម៕
ប្រភព៖ Sportskeeda