លោក Mauricio Pochettino អ្នកចាត់ការក្រុម PSG មានទំនុកចិត្តថាកូនក្រុមរបស់ខ្លួនមានគុណភាពគ្រប់គ្រាន់ក្នុងការយកឈ្នះលើក្រុម Real Madrid បានក្នុងការប្រកួតវគ្គ១៦ក្រុមចុងក្រោយ UEFA Champions League ។
PSG ប៉ះ Real Madrid នៅវគ្គ១៦ក្រុមចុងក្រោយ ត្រូវបានគេមើលឃើញថាជាជំនួបធំជាងគេហើយនៅវគ្គនេះ។ ខណៈដែលក្រុមដទៃទៀត ប៉ះក្រុមកម្រិតល្មមៗប៉ុណ្ណោះ។ តែទោះជាយ៉ាងនេះក្ដី សម្រាប់លោក Pochettino វិញ ថាវានឹងមិនពិបាកលើសសមត្ថភាពរបស់ក្រុម PSG នោះទេ។ ក្រុមបារាំងមានសមត្ថភាពគ្រប់គ្រាន់សម្រាប់តតាំងជាមួយក្រុមអធិរាជសមកពីអេស្ប៉ាញបាន។
អតីតអ្នកចាត់ការក្រុម Spurs ខាងលើបាននិយាយថា៖ “វានឹងពិបាក ព្រោះពួកគេជាក្រុមមួយដែលមានគ្រូបង្វឹកល្អ និងកីឡាករល្អ។ យើងនឹងជួប Real Madrid ដែលជាក្រុមធ្លាប់ឈ្នះ Champions League ជាក្រុមដែលមានប្រវត្តិសាស្ត្រល្អណាស់។ វាច្បាស់ណាស់ថាយើងនឹងប៉ះក្រុមខ្លាំងមួយ។ តែយើងមានគុណភាពគ្រប់គ្រាន់នៅពេលនេះ យើងនឹងអាចយកឈ្នះពួកគេបាន”៕ប្រភព៖ MARCA
