ក្លឹបយក្សអេស្ប៉ាញ Real Madrid ត្រូវបានគេរាយការណ៍ថា កំពុងដាក់គោលដៅលើការចង់បានខ្សែបម្រើឆ្នើមនៃក្លឹបតោខៀវ Chelsea គឺកីឡាករ Mason Mount។ នេះបើតាមសារព័ត៌មាន Fichajes បានចុះផ្សាយ។
ក្រុមដឹកនាំដោយអ្នកចាត់ការលោក Carlo Ancelotti បានពេញចិត្តលើគុណភាពនៃកីឡាករដែលអាចលេងបានទាំងតំណែងបម្រើ និងប្រយុទ្ធដូចជា Mount ហើយជួនពេលដែលក្លឹបអាណាព្យាបាលមិនទាន់លេចលឺលើការបន្តកុងត្រាថ្មីឲ្យគេផង ដូច្នេះវាជាឱកាសល្អ ក្នុងការចូលចរចាសាកល្បង។ ក្រៅពី Real ក៏មានក្លឹប Man City និង Bayern Munich ធ្លាប់ស្ថិតក្នុងចចាមអារ៉ាមចង់បានកីឡាករអង់គ្លេសដូចគ្នា។
គួរបញ្ជាក់ថា Mount ដែលគេដាក់រហស្សនាមឲ្យជា “កូនធម៌តា Pard” គេបានមកប្រលូកនៅក្លឹប Chelsea ក្រោមការដឹកនាំជំនាន់ Frank Lampard រដូវកាល ២០១៩/២០ ហើយបន្តធ្វើបានល្អមកទល់សព្វថ្ងៃ។
វ័យទើបតែ ២២ ឆ្នាំ បង្ហាញខ្លួនសរុបឲ្យក្លឹបមានមូលដ្ឋានក្នុងទីក្រុងឡុង បាន ១២១ ប្រកួត រកបាន ២០ គ្រាប់និង Assist ១៧ លើក។ សុពលភាពកុងត្រារបស់គេត្រូវផុតនៅចុងខែមិថុនា ឆ្នាំ ២០២៤ ហើយអាចមានហាងឆេងថ្លៃខ្លួនល្បាក់ ៧៥ លានអឺរ៉ូ៕
ប្រភព៖ Fichajes