លោក Ronald Koeman ថាចង់រីករាយជាមួយពេលវេលាដែលលោកនៅបន្ដដឹកនាំក្រុម FC Barcelona ដោយមិនខ្វាយខ្វល់ចំពោះមតិរិះគន់អ្វីនោះទេ។
ក្រោយពីដឹកនាំក្រុមលេងចាញ់ក្រុម Real Madrid ក្នុងលទ្ធផល ១-២ មក លោក Koeman អ្នកចាត់ការក្រុម Barcelona រងការវាយប្រហារខ្លាំងពីសំណាក់អ្នកគាំទ្រ។ ដោយចប់ការប្រកួត មានមនុស្សមួយក្រុមឈរចាំលោក និងស្រែកឱ្យចុះចេញពីតំណែងនៅខាងក្រៅទីលានផងដែរ។ តែរឿងនេះមិនបានធ្វើឱ្យអ្នកចាត់ការហុល្លង់ខ្វល់ចិត្តអ្វីនោះទេ។
លោក Koeman បាននិយាយថា៖ “ខ្ញុំធំដឹងក្ដីមក ហើយខ្ញុំដឹងពីរបៀបនៃការធ្វើការងារទាំងនេះ។ ខ្ញុំចង់រីករាយពេលវេលារបស់ខ្ញុំនៅ Barcelona ដែលនៅសល់ ប្រសិនបើវា៨ឆ្នាំ ៦ខែ ១ឆ្នាំ ឬប៉ុន្មានសប្ដាហ៍ទៀតក៏ដោយ។ ខ្ញុំគិតថារឿងសំខាន់គឺយើងឈ្នះការប្រកួតនៅម៉ាឌ្រីត។ យើងមិនអាចចាញ់ហើយចាញ់ទៀតនោះទេ”។
រំលឹកថាក្រុម Barcelona នៅម៉ោង១២រំលងអាធ្រាត្រនេះ មានការប្រកួតនៅលីគ La Liga ទៀតហើយ។ ពួកគេនឹងប៉ះក្រុម Rayo Vallecano ដែលកំពុងស្ថិតនៅលេខ៨ ក្នុងតារាង៕ប្រភព Bbc
