បាល់ទាត់នាយុគសម័យបច្ចុប្បន្ននេះ ក្លឹបជាច្រើននៅតំបន់អឺរ៉ុបបានផ្តោតទៅលើយុវជនដែលពោរពេញដោយគុណភាព ហើយពួកគេស៊ូចំណាយ ១០ ទៅ ២០ លានអឺរ៉ូ យកមកអភិវឌ្ឍបន្ត ព្រោះបើយកមកត្រូវក៏អាចចំណេញកប់ក្តោងខ្លះ ១ ទ្វេជា ១០ ក៏មាន។
វាប្រៀបដូចជាជំនួញមួយក្នុងពិភពបាល់ទាត់ ដែលជាធម្មតាហើយក្លឹបចង់ចាយតិច និងលក់ចេញទៅវិញបានច្រើន។ រីឯក្លឹបខ្លះក៏មានចក្ខុវិស័យរយៈពេលយូរ គឺសម្លឹងរកកីឡាករណាដែលពួកគេអាចយកមកប្រើប្រាស់ច្រើនឆ្នាំ ហើយនៅមានតម្លៃខ្លួន អាចផ្តល់ផលចំណេញមកក្លឹបវិញទៀតនៅពេលក្រោយ។ ខាងក្រោម CTS Sports បង្ហាញឈ្មោះកីឡាករទាំង ៧ ដែលនាំផលចំនេញចូលក្លឹបខ្ពស់បំផុតនៅរយៈពេល ២ ទសវត្សចុងក្រោយ៖
៧) Cristiano Ronaldo
ត្រលប់ទៅឆ្នាំ ២០០៣ ក្លឹបបិសាចក្រហម Man Utd បានចរចាភ្លាមៗលើការនាំយក Cristiano Ronaldo ក្រោយពីឃើញគុណភាពដ៏លេចធ្លោក្នុងការប្រកួតមិត្តភាពឲ្យក្លឹប Sporting CP។ ពេលនោះ ក្រុមដឹកនាំដោយអ្នកចាត់ការ Sir Alex Ferguson បានចាយលុយ ១៩ លានអឺរ៉ូ ទាំងមិនស្ទាក់ស្ទើរ លើការនាំយកយុវជនវ័យ ១៨ ឆ្នាំមកកាន់ទឹកដី Old Trafford។
នេះជាការចំណាយដ៏ត្រឹមត្រូវមួយរបស់ United ដោយរយៈពេល ៦ ឆ្នាំបន្ទាប់ ក្រៅពី Ronaldo អាចបង្កើតសមិទ្ធផលជួយក្លឹបឈ្នះពានរង្វាន់ជាច្រើនហើយ ជាងនេះតម្លៃខ្លួនរបស់លោកពេលផ្ទេរទៅ Real Madrid ក៏អាចនាំផលចំណេញ ៧៥ លានអឺរ៉ូ សម្រាប់បិសាចក្រហមថែមទៀតផង។
៦) Jadon Sancho
យុវជនដែល City មើលរំលង កាលពីឆ្នាំ ២០១៧ បានលក់ទៅឲ្យ Dortmund នៅតម្លៃ ៧,៨៤ លានអឺរ៉ូ លុះទទួលបានការអភិវឌ្ឍត្រឹមតែរយៈពេល ៤ ឆ្នាំ តម្លៃខ្លួន Sancho បានកើនឡើងហួស ១ ទ្វេជា ១០។
កាលពីទីផ្សារដោះដូររដូវក្តៅខែកក្កដាកន្លងទៅនេះ ក្លឹបរួមទីក្រុង Manchester គឺបិសាចក្រហម បានចាយលុយ ៨៥ លានអឺរ៉ូ នាំយកយុវជនវ័យ ២១ ឆ្នាំ ត្រលប់មកស្រុកកំណើត ទឹកដីអង់គ្លេសវិញ។ ការផ្ទេរសារនេះ Dortmund ចំណេញលុយបាន ៧៧,១៧ លានអឺរ៉ូ។
៥) Eden Hazard
ជាអតីតខ្សែប្រយុទ្ធនៅក្លឹប Lille ដែលត្រូវបានតោខៀវ Chelsea ចាយលុយ ៣៥ លានអឺរ៉ូ នាំយកគេមកកាន់ Stamford Bridge នៅឆ្នាំ ២០១២។ រំលងបាន ៧ ឆ្នាំ ក្លឹប Real Madrid ក៏ចាប់អារម្មណ៍មើលឃើញសមត្ថភាពកីឡាករបែលហ្សិក ថាអាចជំនួសវត្តមាន Ronaldo បាន ពេលនោះក្លឹបអេស្ប៉ាញទម្លាក់លុយធំ ១១៥ លានអឺរ៉ូ ទៅឲ្យ Chelsea ដែលនេះជាការផ្ទេរចូលនៅតម្លៃថ្លៃបំផុតក្នុងប្រវត្តិសាស្រ្តក្លឹប Real Madrid។
ដោយឡែកសម្រាប់ក្លឹបអាណាព្យាបាលតោខៀវឯណោះ បូកចុះឡើងពួកគេចំណេញលុយ ៨០ លានអឺរ៉ូ។
៤) Gareth Bale
នេះជាការវិនិយោគនាំផលចំណេញធំបំផុតសម្រាប់ Spurs ដោយកាលពីឆ្នាំ ២០០៧ ពួកគេបានចាយលុយ ១៤,៧ លានអឺរ៉ូ ទិញ Bale ចេញពី Southampton។ ដោយក្រោយលេងបាន ៦ ឆ្នាំឲ្យក្លឹបក្នុងទីក្រុងឡុង តម្លៃខ្លួនសញ្ជាតិវែលក៏ឡើងដល់ ១០១ លានអឺរ៉ូ ពេល Spurs លក់ទៅឲ្យក្លឹប Real Madrid។ ដូច្នេះមានន័យថា អភិវឌ្ឍជើង Bale ៦ រដូវកាល ក្លឹប Spurs ចំណេញលុយ ៨៦,៣ លានអឺរ៉ូ។
៣) Ousmane Dembele
កីឡាករដែលនាំផលចំណេញខ្ពស់បំផុតឲ្យ Dortmund មិនមែនជា Sancho ទេ តែគឺជា Dembele។ ក្លឹបអាល្លឺម៉ង់ កើបផលចំណេញដល់ទៅ ១០០ លានអឺរ៉ូ ក្រោយយកកីឡាករបារាំងចេញពី Rennes នៅឆ្នាំ ២០១៦ ហើយលក់ទៅវិញនៅឆ្នាំ ២០១៧ ឲ្យ Barcelona។
២) Philippe Coutinho
កីឡាករប្រេស៊ីល ត្រូវបាន Liverpool ចាយ ១៣ លានអឺរ៉ូ ថ្ពក់យកគេចេញពី Inter Milan នៅឆ្នាំ ២០១៣ ហើយក្រោយសន្សំគុណភាពរយៈពេល ៥ ឆ្នាំ តម្លៃផ្ទេរចេញជាថ្មីរបស់ Coutinho បានឡើងដល់ ១៣៥ លានអឺរ៉ូ ពោលនាំផលចំណេញ ១២២ លានអឺរ៉ូឲ្យមកហង្សក្រហម ពេលលក់ឲ្យក្លឹប Barcelona។
១) Neymar
ទន្ទឹមនឹងការផ្តល់ផលចំណេញរយលានឲ្យក្លឹបដទៃ សម្រាប់ Barcelona ក៏សម្ងំកើបបានលុយធំមួយប្រ៉ាវផងដែរ កាលលក់ Neymar ឲ្យទៅ PSG។
អ្នកមានបុណ្យចាយ ៨៨,២០ លានអឺរ៉ូ យក Neymar ចេញពី Santos ទាំងមិនញញើតដៃ ហើយវាជាការសម្រេចចិត្តដ៏ត្រឹមត្រូវ ព្រោះនៅ ៤ ឆ្នាំបន្ទាប់ ក្លឹបម្ចាស់ដី Camp Nou អាចផ្ទេរក្នុងតម្លៃបំបែកកំណត់ត្រាពិភពលោកទៅឲ្យ PSG ជាមួយផលចំណេញដល់ទៅ ១៣៣,៨ លានអឺរ៉ូ៕
ប្រភព៖ TransferMarkt