ក្រុមជម្រើសជាតិអ៊ីតាលី មិនទទួលបាន ៣ ពិន្ទុនោះទេ ពីការប្រកួតទល់បុលហ្គារីនៅជុំទី ៤ វគ្គចូលពូល សម្រាប់ព្រឹត្តិការណ៍ជម្រុះបឋម World Cup 2022 កាលពីយប់មិញ។ មួយគ្រាប់របស់ Federico Chiesa នៅនាទី ១៦ បានត្រឹមជួយឲ្យក្រុមយក ១ ពិន្ទុពីបុលហ្គារី ក្រោយខាងគូប្រជែងរកបានគ្រាប់បាល់តាមស្មើនៅនាទី ៣៩ ដោយកីលាករ Atanas Illiev។
ទៅមើលស្ថិតិលេងយប់មិញ អ៊ីតាលីលេងបាល់សឹងមួយតារាងតែឯង ដោយស៊ុតណាស់ដែរដល់ទៅ ២៧ លើក ចំគោលដៅ ៨ លើក គ្រប់គ្រងបាល់ ៧៩ ភាគរយ ធៀបនឹងខាងបុលហ្គារី ស៊ុតបានតែ ៤ លើក ចំគោលដៅ ២ លើក ប៉ះបាល់បានតែ ២១៨ លើកគត់ ពោលស្ថិតិខុសគ្នា ១ ទ្វេជា ៤-៤ ឯណោះ។
យ៉ាងណាការស្មើនេះ អ៊ីតាលីនៅបន្តឈរលេខ ១ ដដែលក្នុងពូល C ដោយមាន ១០ ពិន្ទុពេញ ក្រោយឆ្លងកាត់ការប្រកួត ៤ លើក។ ពួកគេត្រូវប៉ះក្រុមខ្លាំងស្វីសនៅជុំបន្ទាប់ លេងថ្ងៃទី ៦ កញ្ញា ហើយប្រសិនអាចឈ្នះឬស្មើ នោះលោក Roberto Mancini នឹងបង្កើតកំណត់ត្រាថ្មីមួយទៀតហើយ គឺលេងមិនស្គាល់ពាក្យថា ចាញ់ ៣៦ ប្រកួត យកឈ្នះទៅលើប្រេស៊ីលនិងអេស្ប៉ាញបាន៕
ប្រភព៖ Marca