រឿងរ៉ាវ “ជីវិត Messi នៅក្លឹប Barcelona” បានឈានមកដល់ភាគបញ្ចប់ ក្រោយពីក្លឹបម្ចាស់ដី Camp Nou ប្រកាសនូវបញ្ហារាំងស្ទះ នាំឲ្យការចរចាកុងត្រាថ្មីជាមួយកីឡាករអាហ្សង់ទីនមិនអាចសម្រេចទៅបាន។
ពេលវេលាជាង ១៦ ឆ្នាំនៅក្លឹបទោលរបស់ Messi ក៏បានឈានមកដល់សញ្ញាខណ្ឌ ហើយចុងក្រោយ Barcelona បានត្រឹមបន្សល់ពាក្យអរគុណ និងជូនពរដល់ Messi ឲ្យសម្រេចជោគជ័យនៅអាជីពជាមួយក្លឹបបន្ទាប់នាពេលខាងមុខ។ ស្របពេលដែល M10 កំពុងទំនេរជើងជាកីឡាករឥតតម្លៃខ្លួន ដែលទាមទារតែការចរចាថ្លៃពលកម្ម ក៏នាំឲ្យមានក្លឹបជាច្រើនហាក់បង្ហាញការចាប់អារម្មណ៍ ជាពិសេសគឺបណ្តាក្លឹបធំៗនៅឯក្របខ័ណ្ឌកំពូលអង់គ្លេស។
យ៉ាងណាផ្លូវមួយក្នុងចំណោមផ្លូវជាច្រើនខាងមុខរបស់ Messi ក៏អាចជានឹងនាំឲ្យលោក ជួបគូប្រជែងចាស់ តែមកសារនេះមិនមែនជាសត្រូវ តែគឺជាមិត្តចាប់ដៃសហការគ្នាលើទីលាន។ ខាងក្រោម CTS Sports បង្ហាញសត្រូវចាស់ ៥ រូប ដែលអាចក្លាយជាមិត្តរួមក្រុមថ្មីរបស់ Messi នៅពេលខាងមុខ៖
៤) Raphael Varane
ជាខ្សែការពារកណ្តាលរបស់ Man Utd តែអតីតកាល គឺជាជញ្ជាំងការពារដ៏រឹងមាំរបស់ក្លឹបអេស្ប៉ាញ Real Madrid។ Varane ក៏ធ្លាប់ប៉ះទង្គិចលើទីលានជាមួយ Messi ច្រើនសារមកហើយដែរ តែថាមិនត្រូវនៅពេលខាងមុខ ប្រសិន Man Utd អាចមានលទ្ធភាពនាំយកកីឡាករអាហ្សង់ទីនបានដោយជោគជ័យ នោះវាក៏នឹងក្លាយជារឿងដ៏ភ្ញាក់ផ្អើលមួយ។
៣) Thiago Silva
ខ្សែការពារសញ្ជាតិប្រេស៊ីល ធ្លាប់ជួយ PSG តតាំង Barcelona កាលពីនៅ Champions League ប៉ុន្មានឆ្នាំមុន ដោយជើងទី ១ លុតអ្នកមានបុណ្យ ៤-០ មុនទទួលរងការវាយបក ៦-១ វិញនៅជើងទី ២។ លើសពីនេះ Silva និង Messi ក៏ធ្លាប់ប៉ះគ្នា នៅព្រឹត្តិការណ៍អន្តរជាតិ Copa America ច្រើនលើកផងដែរ ពោលប្រេស៊ីលធ្លាប់ផ្តល់មេរៀនជូរចត់ឲ្យអាហ្សង់ទីនរាប់ភ្លេច ទម្រាំពួកគេអាចសាងកេរឈ្មោះលើកពានជាលើកដំបូងនៅឆ្នាំ ២០២១។
តាមថាវាអាចកើតឡើងទៅបាន ការដែល Messi ផ្ទេរមក Stamford Bridge ព្រោះអីពេលនេះក្លឹបដែលសេដ្ឋីរុស្ស៊ី ជាប្រធាន ក៏កំពុងចង់បានម៉ាស៊ីនបញ្ចប់ទីថ្មីស្រាប់ផង ហើយលឺថាហ៊ានចាយដល់ខ្ទង់រយលានលើការនាំយក Lukaku។ ដូច្នេះបើពួកគេបង្វែររ៉ាដាពីការចរចាកីឡាករបែលហ្សិក មកកីឡាករអាហ្សង់ទីន នោះថាមិនត្រូវ Silva ក៏នឹងក្លាយជាមិត្តរួមក្រុមរបស់ Messi នៅពេលដ៏ខ្លីខាងមុខ។
២) Ederson
អ្នកចាំទី Ederson មិនសូវប៉ះគ្នាជាមួយ Messi នៅការលេងឲ្យក្លឹបនោះទេ តែការប្រជែងនៅជម្រើសជាតិ ដែលប្រេស៊ីល និងអាហ្សង់ទីនស្ថិតនៅទ្វីបតែមួយ គឺរមែងកើតឡើងច្រើន។
ដូច្នេះហើយបើ M10 ដាក់ចិត្តជ្រើសយក Man City ជាក្លឹបថ្មីនៅពេលបន្ទាប់ នោះមិនត្រឹមតែបានជួបលោក Pep Guardiola ដែលជាគ្រូចាស់ប៉ុណ្ណោះទេ ទៀតសោតក៏មានពេលវេលាបង្កើតចំណងមិត្តភាពថ្មី ជាមួយគូប្រជែង Ederson ផងដែរ។ ករណីនេះអាចកើតឡើងទៅបាន លុះត្រា City បញ្ឈប់ការចង់បាន Harry Kane ពី Tottenham Hotspur ហើយងាកមកចរចាជាមួយ M10។
១) Sergio Ramos និង Keylor Navas
Messi តែងតែនិយាយថា ចង់មានពេលវេលារួមជើងជាថ្មីជាមួយនឹង Neymar ដូច្នេះនេះជាពេលល្អបំផុតហើយ ក្នុងការដើរតាមបេះដូងរបស់ខ្លួន។
យ៉ាងណាក្រៅពីបានជួបមិត្តចាស់ Messi ក៏ប្រឈមនឹងត្រូវជួបសត្រូវចាស់ ដែលជាអតីតកូនក្រុម Madrid ២ រូបផងដែរ នោះគឺអ្នកចាំទី Keylor Navas និងខ្សែការពារ Sergio Ramos។ ដូចអ្នកដឹងស្រាប់ហើយ កាលនៅ La Liga ឲ្យតែ El Clasico កើតឡើងម្តងៗ ដឹងតែពួកគេហែកមុខយក្សដាក់គ្នា មិនឲ្យប្រកួតនោះស្ងាត់កីឡដ្ឋានឡើយ។ សរុបមកតើអ្នកគិតថា តារាឆ្នើមវ័យ ៣៤ ឆ្នាំ គួរតែជ្រើសរើសយកក្លឹបណាមួយនៅពេលបន្ទាប់?