SCG Muang Thong United បានតែងតាំងគ្រូបង្វឹកថ្មីហើយ ឈ្មោះថា Radovan Curcic ដែលមានបទពិសោធច្រើនក្នុងការដឹកនាំក្រុម។
បុរសវ័យ៤៦ឆ្នាំខាងលើនេះ ជាអតីតគ្រូបង្វឹករបស់ក្រុមជម្រើសជាតិសែប កាលពីឆ្នាំ២០១៤ដល់២០១៦។ ត្រឹមវ័យ៤៦ឆ្នាំនេះ Radovan ធ្លាប់បានដឹកនាំក្រុមអាជីពជាច្រើន រួមមាន Javor Ivanjica (២០០៣ដល់២០០៦) Borac Čačak (២០០៦ដល់២០០៧)និងដឹកនាំក្រុម Javor Ivanjica ម្ដងទៀតនៅឆ្នាំ២០០៧ដល់២០១០។ ចន្លោះឆ្នាំ ២០១០ ដល់២០១២ លោកធ្វើជាជំនួយការគ្រូបង្វឹករបស់ជម្រើសជាតិសែប មុនពេលមានឱកាសឡើងកាន់តែគ្រូបង្វឹកធំតែម្ដង។
ក្នុងការមកដឹកនាំក្រុមថៃ SCG Muang Thong United នេះ លោក Radovan បាននិយាយថា៖ “ខ្ញុំសប្បាយចិត្តដែលបានមកកាន់ក្លឹបនេះ ហើយខ្ញុំនឹងព្យាយាមឱ្យអស់ពីសមត្ថភាពដើម្បីនាំក្រុមទៅដល់ចំណុចកំពូលវិញ។ Muang Thong ជាក្រុមធំជាងគេនៅប្រទេសថៃ ជាមួយអ្នកគាំទ្រដ៏អស្ចារ្យ យើងនឹងត្រលប់ទៅរកសភាពដើមរបស់យើងវិញ”។
Curcic ជាគ្រូបង្វឹកបរទេសទី៩របស់ក្រុម Muang Thong បន្ទាប់ពីលោក Rene Desaeyere, Carlos Roberto Carvalho, Henrique Calisto, Robbie Fowler, Slavisa Jokanovic, Winfried Schafer, Scott Cooper និង Dragan Talajic។ បច្ចុប្បន្ន ក្រុមមួយនេះកំពុងឈរនៅចំណាត់ថ្នាក់ទី៥ក្នុងតារាងលីគកំពូលថៃ ដោយឆ្លងកាត់១៣ប្រកួត មាន២១ពិន្ទុ ចាញ់ក្រុមកំពូលតារាង Buriram United ដែលមាន២៩ពិន្ទុ៕