ដរាបណាទីផ្សារដោះដូរមិនទាន់បិទទ្វារ អ្នកគាំទ្រក្លឹប Real Madrid នៅតែរង់ចាំអុតមើលរឿងអភិនិហាដែលអាចកើតឡើង ពាក់ព័ន្ធនឹងការផ្ទេរ Kylian Mbappe ចេញពីក្លឹបសេដ្ឋីបារាំង Paris Saint-Germain។
ដោយឃើញដូចជាក្លឹប Man Utd ដែលចំណាយទាំងលានៗ ក៏នាំឲ្យអ្នកគាំទ្រ Real រំពឹងថាក្លឹបរបស់ខ្លួនអាចចាយខ្ទង់រយលាន បំបែកកំណត់ត្រានាំយកយុវជនសញ្ជាតិបារាំង Mbappe អ៊ីចឹងដែរ តែតាមការបញ្ជាក់របស់សាមីខ្លួន គឺច្បាស់លាស់ហើយថាគ្មានផ្លូវទេនៅរដូវក្តៅនេះ។
នោះគឺត្រង់សម្តីដែលគេថា មហិច្ឆតាឈ្នះពាន UCL ជាមួយក្លឹប PSG ជាក្តីស្រមៃធំបំផុតដែលគេចង់បាន ដូច្នេះមានន័យថា គេនៅតែចង់បន្តចូលរួមជាមួយ PSG ក្នុងការដណ្តើមពានរង្វាន់អឺរ៉ុបនៅរដូវកាលថ្មី ២០២១/២២ ខាងមុខ។
និយាយប្រាប់ទស្សនាវដ្ដីផ្លូវការរបស់ក្លឹប PSG កីឡាករវ័យ ២២ ឆ្នាំនិយាយ៖ “ក្តីស្រមៃដ៏ធំបំផុតរបស់ខ្ញុំគឺការឈ្នះពាន Champions League ជាមួយក្លឹប PSG ដែលវាជារឿងដ៏អស្ចារ្យបំផុត ហើយបើអាចឈ្នះពាន World Cup មួយបន្ថែមទៀត ក៏វាល្អដែរ”។
គួររំឭកថា Mbappe រកបាន ១៣២ គ្រាប់នៅការបង្ហាញខ្លួន ១៧១ ប្រកួត កំឡុងការចាយពេល ៤ ឆ្នាំជាមួយក្លឹបមានមូលដ្ឋានក្នុងទីក្រុងប៉ារីស។ Mbappe ទំនងជានឹងមានវត្តមាននៅការប្រកួតសំខាន់ដណ្តើមពាន Trophee des Champions នៅចុងសប្តាហ៍នេះ ទល់ក្លឹប Lille ដែលជាម្ចាស់ជើងឯក Ligue 1 រដូវកាលចាស់៕
ប្រភព៖ Sportsmole