លោក Luis Enrique គ្រូបង្វឹកក្រុមជម្រើសជាតិអេស្ប៉ាញ ថាបើសិនជាអ៊ីតាលីឈ្នះក្រុមខ្លួននៅប្រកួតយប់នេះ នោះនៅវគ្គផ្ដាច់ព្រ័ត្រលោកនឹងគាំទ្រក្រុមនេះហើយ។
ក្រុមជម្រើសជាតិអេស្ប៉ាញ នឹងត្រូវប្រកួតជាមួយក្រុមអ៊ីតាលីសម្រាប់វគ្គពាក់កណ្ដាលផ្ដាច់ព្រ័ត្រពានរង្វាន់ Euro 2020 នៅម៉ោង២រំលងអាធ្រាត្រនេះ។ ការប្រកួតនេះដែរ នឹងធ្វើឱ្យអ្នកគាំទ្រសប្បាយក្នុងការទស្សនាមិនខាន ព្រោះក្រុមទាំងពីរនេះសុទ្ធតែធ្វើបានល្អដូចគ្នា។ ដោយឡែកពួកគេក៏មានប្រវត្តិជួបគ្នានៅវគ្គផ្ដាច់ព្រ័ត្ររួចមកហើយដែរ។ ដោយកាលនោះ អេស្ប៉ាញ ជាអ្នកឈ្នះលើក្រុមអ៊ីតាលី។
មុនការប្រកួតចាប់ផ្ដើម លោក Luis Enrique បាននិយាយថា៖ “អ៊ីតាលីជាក្រុមល្អ ពួកគេលេងស្រដៀងអេស្ប៉ាញដែរ។ អ៊ីតាលី មានប្រព័ន្ធការពារល្អណាស់ ហើយខ្ញុំក៏សោកស្ដាយដែលSpinazzola មិនអាចលេងបានក្នុងប្រកួតនេះ។ ប្រសិនបើយើងឈ្នះប្រកួតស្អែក វាជារឿងល្អសម្រាប់យើង ប៉ុន្តែបើអ៊ីតាលីធ្វើបានវិញ ខ្ញុំនឹងគាំទ្រអ៊ីតាលីក្នុងប្រកួតផ្ដាច់ព្រ័ត្រ”៕ប្រភព Football
