ក្រុមហុងគ្រីបានបង្កើតលទ្ធផលមិនគួរឲ្យជឿនៅ Euro 2020 សារនេះ ដោយដ្បិតមិនអាចឆ្លងទៅវគ្គ ១៦ ក្រុម តែការប្រកួតនៅវគ្គចែកពូលគឺធ្វើបានល្អច្រើន ដូចជាការលេងស្មើបារាំងនិងអាល្លឺម៉ង់ ហើយចាញ់តែព័រទុយហ្គាល់មួយគត់។
យ៉ាងណាលទ្ធផលនៅការប្រកួត Euro 2020 គិតមកដល់វគ្គ ៨ ក្រុម ក្រុមទាំង ៤ នៅពូលមរណៈដែលមានហុងគ្រី អាល្លឺម៉ង់ បារាំង ព័រទុយហ្គាល់ ទីបំផុតសម្រេចហាលអាវទាំងអស់ហើយ ក្រោយ ៣ ក្រុមដែលខ្លាំងនោះសុទ្ធតែធ្លាក់កាលពីវគ្គមុន ១៦ ក្រុម។
ទៅមើលអ្នកចាត់ការហុងគ្រី ក្រោយពីឃើញលទ្ធផលបែបនេះ លោកក៏បានបង្ហោះរូបភាពបែបដុតបញ្ឈឺមួយសន្លឹកនៅលើបណ្តាញសង្គម Instagram ដោយមានរូបលោកជាអ្នកចាត់ការហុងគ្រី លាយឡំនឹងកីឡាករ ៣ រូបផ្សេងទៀតមានដូចជា Ronaldo (ព័រទុយហ្គាល់), Neuer (អាល្លឺម៉ង់) និង Mbappe (បារាំង) មានអូសវ៉ាលីរៀងខ្លួន ហើយលោក Marco Rossi បានសរសេរ Caption ថា៖ “ជួបគ្នាឆាប់ៗនៅឆ្នេរសមុទ្រ”។ ដោយនេះមានន័យថា ក្រុមទាំង ៤ ក៏បានហាលអាវ ដល់ពេលសម្រាកលំហែកាយហើយ។
សារនេះបានមានការចែករំលែកបន្តជាច្រើនពាសពេញប្រព័ន្ធអ៊ីនធឺណិត ហើយអ្នកគាំទ្រខ្លះក៏អស់សំណើច ខ្លះក៏កើតទុក្ខ ព្រោះនេះជាលទ្ធផលមិនគួរឲ្យជឿ ដែលក្រុមកំណាចៗបែរជាមកធ្លាក់ត្រឹមវគ្គ ១៦ ក្រុមទៅវិញ៕
ប្រភព៖ Instagram