នៅវេលាម៉ោង ១១:០០ នាទីយប់ថ្ងៃអង្គារសប្តាហ៍ក្រោយ នឹងមានការប្រកួតដ៏ជក់ចិត្តមួយ រវាងក្រុមជម្រើសជាតិអង់គ្លេស ទល់អាល្លឺម៉ង់ នៅវគ្គ ១៦ ក្រុម Euro 2020 ដែលពួកគេនឹងមានមួយត្រូវធ្លាក់ ហើយមានមួយត្រូវឡើងទៅកាន់វគ្គបន្ទាប់ ៨ ក្រុមចុងក្រោយ។
មុនឈានដល់ការប្រកួត អតីតអ្នកចាត់ការនៅក្លឹប Man Utd/Spurs លោក Jose Mourinho ដែលទំនងជាអ្នកគាំទ្ររបស់តោកំណាច បាននិយាយថា Gareth Southgate គួរតែប្រើប្រាស់ប្រព័ន្ធការពារកណ្តាល ៣ រូបនៅជំនួបទល់អាល្លឺម៉ង់នៅពេលខាងមុខនេះ។
ប្រាប់ talkSport លោក Mourinho ថា៖ “ខ្ញុំនៅតែនិយាយថា បើអ្នក [Southgate] មានកីឡាករ ២៦ រូប អ៊ីចឹងត្រូវតែប្រើប្រាស់ពួកគេ ដ្បិតបើត្រូវប្រឈមហានិភ័យ ឬដាក់កីឡាកររបួសចូលលេងក៏ដោយ ប្រសិនពួកគេសក្តិសមនឹងបានចូលលេង”។
លោកបន្តថា៖ “Maguire ជាកីឡាករមួយដែលពោរពេញដោយទំនុកចិត្ត អ្នកមើលតែភាពឈ្លាសវៃរបស់គេ [ពេលលេងទល់ឆេក] ទៅ គេអាចសហការគ្នាបានយ៉ាងល្អជាមួយ Stone ហើយខ្ញុំជឿថាអាល្លឺម៉ង់នឹងប្រើប្រាស់ Havertz, Muller និង Gnabry អ៊ីចឹងអង់គ្លេសគួរតែប្រើប្រាស់ ៣ រូបនៅការពារកណ្តាល មាន Stones, Maguire និង Mings”៕
ប្រភព៖ បរទេស