អ្នកចាត់ការលោក Ronald Koeman នៅតែផ្តល់ចម្លើយវិជ្ជមាន តែសារនេះហាក់ច្បាស់ជាងមុនបន្ថែមទៀត អំពីអនាគតរបស់ Memphis Depay ដែលកំពុងមានមន្ទិលសង្ស័យក្រោយត្រៀមផុតកុងត្រាជាមួយនឹងក្លឹប Lyon។
គ្រូសញ្ជាតិហូឡង់ បានខកខានការនាំយក Wijnaldum ដែល PSG ដណ្តើមយកមួយរួចទៅហើយ ឥឡូវ Depay ក៏មិនទាន់ច្បាស់ ១០០ ភាគរយដែរ តែលោកបង្ហើបថាមានភ្លើងខៀវច្រើនជាងភ្លើងក្រហម។
Koeman និយាយ៖ “Memphis [Depay] គេប្រាប់ខ្ញុំខ្លះៗអំពីអនាគតរបស់គេ ហើយខ្ញុំក៏អាចបញ្ជាក់ប្រាប់អ្នករាល់គ្នាបានដែរ គ្រាន់ថាកិច្ចព្រមព្រៀងនេះមិនទាន់ចុះហត្ថលេខាសម្រេចនៅឡើយ តែវាកៀកនឹងសម្រេចហើយ និយាយទៅខ្ញុំចង់បានគេតាំងពីខែមករាមកម្ល៉េះ បើមកបានកាលនោះគឺល្អណាស់សម្រាប់យើង”។
គួរបញ្ជាក់ថា Depay កំពុងជាប់ភារកិច្ចជួយជម្រើសជាតិហូឡង់ឯណោះ ដែលត្រៀមនឹងប្រកួតទល់អូទ្រីសនៅម៉ោង ០២:០០ នាទីរំលងអាធ្រាត្រយប់នេះ៕
ប្រភព៖ AF