ម្ចាស់ផ្ទះស៊ីហ្គេម វៀតណាម ឆ្នាំ២០២១បានផ្ញើលិខិតជូនដំណឹងដល់បណ្តាប្រទេសនានានៅក្នុងអាស៊ីអាគ្នេយ៍ ស្តីពីការពន្យារពេល នៃការប្រកួតកីឡាស៊ីហ្គេម លើកទី៣១ និងការប្រកួតកីឡាជនពិការ អាស៊ានប៉ារ៉ាហ្គេម លើកទី១១ ឆ្នាំ២០២១ ដែលគ្រោងនឹងធ្វើឡើងពីថ្ងៃទី២១ ខែវិច្ឆិកា ដល់ថ្ងៃទី០២ ខែធ្នូ ឆ្នាំ២០២១ ដោយគ្រោងទៅធ្វើនាឆ្នាំ២០២២ជំនួសវិញ ដោយសារវិបត្តិជំងឺកូវីដ-១៩។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ ហៅកាត់ គ.ជ.ប.អ. (CAMSOC) និងជាអគ្គលេខាធិការគណៈកម្មាធិការជាតិអូឡាំពិកកម្ពុជា បានបញ្ជាក់ឱ្យដឹងនៅព្រឹកថ្ងៃ១៣រោច ខែជេស្ឋ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃអង្គារ ទី០៨ ខែមិថុនា ឆ្នាំ២០២១នេះថា ម្ចាស់ផ្ទះ ស៊ីហ្គេម វៀតណាម បានជូនដំណឹងស្តីពីការពន្យារពេលនៃស៊ីហ្គេម ឆ្នាំ២០២១នេះ ប៉ុន្តែមិនទាន់ផ្លូវការនៅឡើយទេ។
ពេលនេះគណៈកម្មាធិការជាតិអូឡាំពិកកម្ពុជា បានទទួលលិខិតពីគណៈកម្មាធិការជាតិវៀតណាមថា អូឡាំពិកវៀតណាមមានបំណងចង់ពន្យារពេលរហូតដល់ខែកក្កដា ឆ្នាំ២០២២ ប៉ុន្តែត្រូវដាក់បញ្ហានេះទៅក្នុងអង្គប្រជុំគណៈអចិន្រ្តៃយ៍សហព័ន្ធកីឡាអាស៊ីអាគ្នេយ៍ ដើម្បីស្នើសុំយោបល់ជាមុនសិន មុននឹងសម្រេចជាផ្លូវការ។ កិច្ចប្រជុំបន្ទាន់នេះនឹងត្រូវធ្វើឡើងនៅថ្ងៃទី០៩ ខែមិថុនា ២០២១ វេលាម៉ោង ១រសៀល តាមប្រព័ន្ធ zoom។
កាលពីចុងខែឧសភា ឆ្នាំ២០២១ ម្ចាស់ផ្ទះវៀតណាមបានបញ្ជាក់ជំហររបស់ខ្លួនថា ប្តេជ្ញាចិត្តខ្ពស់នឹងព្យាយាមធ្វើស៊ីហ្គេម នាចុងឆ្នាំ២០២១ឱ្យបាន ។ ប៉ុន្តែដោយសារស្ថានភាពជាក់ស្តែងនៃវិបត្តិជំងឺកូវីដ-១៩ ដែលនៅតែរីករាលដាលជាសកលនេះ បានធ្វើឱ្យម្ចាស់ផ្ទះមួយនេះបានជូនដំណឹងស្តីពីការពន្យារពេលបណ្តោះអាសន្ន ដោយរង់ចាំការសម្រេចក្នុងអង្គប្រជុំអន្តរជាតិតាមប្រព័ន្ធអនឡាញ នារសៀលថ្ងៃទី០៩ ខែមិថុនា ឆ្នាំ២០២១។
ម្ចាស់ផ្ទះស៊ីហ្គេមវៀតណាម បានកំណត់បង្ហាញថា ស៊ីហ្គេម២០២១នេះមានប្រភេទកីឡា ដាក់ឱ្យបណ្តាប្រទេសក្នុងអាស៊ានសរុបចំនួន១១ប្រទេស ប្រកួតប្រជែងលើ៤០ប្រភេទកីឡា និងមានវិញ្ញាសាសរុបចំនួន ៥២៦ ៕