Jesse Lingard ធ្វើបានល្អយ៉ាងខ្លាំងក្រោយផ្ទេរមកចូលរួមនៅ West Ham United ដោយកន្លងទៅនេះគេក៏ទើបតែឈ្នះពានបុគ្គល នាមកីឡាករល្អបំផុតប្រចាំខែ និងជាអ្នករកបានគ្រាប់បាល់ល្អបំផុតប្រចាំខែផងដែរ។
ក្រោយផ្ទេរមកក្រុមញញួរកីឡាករអង់គ្លេសរកបាន ៩ គ្រាប់និង Assist ៤ លើកនៅការបង្ហាញខ្លួន ១៣ ប្រកួត ពោលគឺសឹងតែរៀងរាល់ការប្រកួតគេតែងមានមុខក្នុងចំណែកការរកគ្រាប់បាល់។
លើសពីជោគជ័យដ៏អស្ចារ្យនេះ Lingard ក៏នឹងក្លាយជាកីឡាករ ដែលអាចរកប្រាក់ចូលក្លឹប Man Utd ប្រមាណ ៥០០ ០០០ ផោនឬជាង ៧០០ ០០០ ដុល្លារនៅក្រោយបញ្ចប់រដូវកាល ប្រសិនណាគេអាចជួយ West Ham ឲ្យឈរនៅលេខ ៤ ឬមានកៅអីលេង UCL នារដូវកាលក្រោយ។ នោះគឺវាកើតឡើងបានស្របទៅតាមកិច្ចព្រមព្រៀង ដែលកំណត់ថាប្រសិនកីឡាករដែល United ដាក់ឲ្យខ្ចីជើង អាចជាចំណែកជួយក្រុមនោះឈរនៅ Top 4 អ៊ីចឹងក្លឹបជាអាណាព្យាបាលនឹងទទួលបានប្រាក់បន្ថែម។
លុយពេលនេះនៅនឹងមុខហើយព្រោះការប្រកួតនៅ Premier League សល់តែ ៣ ជុំទៀតប៉ុណ្ណោះ ហើយ West Ham ក៏អាចមានឱកាសច្រើនដែរ ដ្បិតពួកគេឈរនៅលេខ ៥ តែចាញ់ហង្សត្រឹម ២ ពិន្ទុ។ បើមើលតាមទម្រង់លេងចុងក្រោយគឺក្រុមញញួរមានឱកាសច្រើនក្នុងការបញ្ចប់រដូវកាល ដោយឈរនៅចំណាត់ថ្នាក់យ៉ាងហោចណាស់ទី ៤៕
ប្រភព៖ DailyMail