នៅពាក់កណ្ដាលសប្ដាហ៍នេះ ការប្រកួតនៅ UEFA Champions League និង Europa League នឹងសម្រេចរកឃើញឈ្មោះក្រុមទាំង ៤ ដែលត្រូវឡើងទៅកាន់វគ្គពាក់កណ្ដាលផ្ដាច់ព្រ័ត្រ។ ការប្រកួតជើងទី ២ នៅ UCL នឹងចាប់ផ្ដើមនៅព្រឹកថ្ងៃពុធ ហើយ UEL នៅព្រឹកថ្ងៃសុក្រ។
ជឿថាប្រិយមិត្តមួយចំនួន ក្រោយពីបានឃើញលទ្ធផលនៅប្រកួតជើងទី ១ អ្នកប្រាកដជានៅស្ទាក់ស្ទើរក្នុងការគណនាគ្រាប់បាល់ ក៏ដូចជារូបមន្តគ្រាប់បាល់ក្រៅដី (Away Goal) ក្នុងការសម្រេចរកក្រុមឆ្ពោះទៅកាន់វគ្គបន្ទាប់។ អ៊ីចឹងក្នុងអត្ថបទនេះ CTS Sports នឹងបង្ហាញលទ្ធផលងាយៗដែលក្រុមទាំងអស់ត្រូវការជាចាំបាច់នៅជើងទី ២ ប៉ុន្តែយើងសូមធ្វើការពន្យល់ពីនិយមន័យនៃរូបមន្ត Away Goal ជាមុនសិន៖
អ្វីទៅជារូបមន្តការគណនាគ្រាប់បាល់ក្រៅដី?
ក្នុងច្បាប់បាល់ទាត់ ការគណនាគ្រាប់បាល់ក្រៅដី គឺធ្វើឡើងក្នុងការប្រកួត ២ ជើង នៅទឹកដីរបស់ក្រុមនីមួយៗទៅវិញទៅមក។ ប្រសិនការប្រកួតទាំងពីរជើង គេបូកគ្រាប់បាល់ឃើញថា ស្មើ គ្នា នោះគេនឹងចាប់ផ្តើមគិតដល់គ្រាប់បាល់ក្រៅដី ដោយរវាងក្រុមទាំងពីរ ប្រសិនក្រុមណាមួយរកបានគ្រាប់បាល់នៅក្រៅដីច្រើនជាង នោះគឺជាក្រុមដែលត្រូវឡើងទៅកាន់វគ្គបន្ទាប់។
ជាឧទាហរណ៍ដូចជាការប្រកួតវគ្គ ៨ ក្រុមចុងក្រោយ Champions League រដូវកាល ២០១៧/១៨ ដោយកាលនោះក្នុងទឹកដី Barcelona នៅជើងទី ១ ពួកគេបានយកឈ្នះ ៤-១ ទៅលើ Roma។ លុះដល់ជើងទី ២ ក្នុងទឹកដីអ៊ីតាលី Roma បានយកឈ្នះ ៣-០ វិញ ជាការពិតបើយើងបូកគ្រាប់បាល់បញ្ចូលគ្នាគឺឃើញថា ៤-៤ ប៉ុន្តែដោយសារនៅក្រៅដី Roma អាចរកបានមួយគ្រាប់នៅជើងទី ១ ហើយ Barcelona រកបាន ០ គ្រាប់នៅក្រៅដីនៃជើងទី ២ អ៊ីចឹងគឺសម្រេចឲ្យ Roma ជាក្រុមដែលត្រូវឡើងទៅកាន់វគ្គបន្ទាប់។
ក្នុងករណីដដែលនេះប្រសិនណានៅជើងទី ២ Roma ស៊ី Barcelona ៤-១ នោះលទ្ធផលបូកគ្រាប់បាល់បញ្ចូលគ្នាគឺ ៥-៥ ហើយគ្រាប់បាល់ក្រៅដីមានមួយគ្រាប់ស្មើគ្នា បែបហ្នឹងគឺសម្រេចបន្ថែមម៉ោងការប្រកួត ១៥ នាទីពីរដង ឬអាចឈានដល់ការស៊ុតប៉េណាល់ទីយកចាញ់ឈ្នះ។
តោះយើងមកមើលលទ្ធផលនៃជើងទី ២ សម្រាប់ក្រុមទាំងអស់នៅរដូវកាល ២០២០/២១ វិញម្ដង៖
លទ្ធផលនៅជើងទី ១ UCL:
Real Madrid ឈ្នះ Liverpool ៣-១ នាំឲ្យជើងទី ២ Liverpool ត្រូវការឈ្នះ ២-០
Man City ឈ្នះ Dortmund ២-១ នាំឲ្យជើងទី ២ Dortmund ត្រូវការឈ្នះ ១-០
Bayern ចាញ់ PSG ២-៣ នាំឲ្យជើងទី ២ Bayern ត្រូវការឈ្នះ ២-០
Porto ចាញ់ Chelsea ០-២ នាំឲ្យជើងទី ២ Porto ត្រូវការឈ្នះ ៣-០
លទ្ធផលនៅជើងទី ១ UEL:
Arsenal ស្មើ Slavia Praha ១-១ នាំឲ្យជើងទី ២ Slavia Praha ត្រូវការត្រឹមស្មើ ០-០ ហើយ Arsenal បើចង់ឈ្នះត្រូវស៊ី ១-០ ជាកំហិត
Granada ចាញ់ Man Utd ០-២ នាំឲ្យជើងទី ២ Granada ត្រូវការឈ្នះ ៣-០
Ajax ចាញ់ Roma ១-២ នាំឲ្យជើងទី ២ Ajax ត្រូវការឈ្នះ ២-០
Dinamo Zagreb ចាញ់ Villarreal ០-១ នាំឲ្យជើងទី ២ Dinamo ត្រូវការឈ្នះត្រឹម ២-១ ក៏បាន៕