ក្រោយមានរឿងចម្រូងចម្រាសពាក់ព័ន្ធនឹងគ្រាប់បាល់របស់ Cristiano Ronaldo ទល់ក្រុមស៊ែប៊ី ដែលអាជ្ញាកណ្ដាលមិនផ្ដល់ឲ្យ ក៏ចាប់ផ្ដើមមានមតិជាច្រើនបានកើតមានចម្ងល់ថា ហេតុអ្វីក្នុងការប្រកួតនោះពុំមានការប្រើប្រាស់នៅប្រព័ន្ធ VAR និងបច្ចេកវិទ្យា Goal-line?
ជឿថាអ្នកគាំទ្របាល់ទាត់ភាគច្រើន ដឹងត្រឹមថា Goal-line Technology គឺជាបច្ចេកវិទ្យាដែលគេប្រើប្រាស់សម្រាប់ជំនួយដល់ការមើលបាល់ចូលទីឬអត់ ដែលរាប់ថាជាជំនួយការពិសេសមួយដល់ការសម្រេចចិត្តរបស់អាជ្ញាកណ្ដាល ប៉ុន្តែអ្នកមិនទាន់បានដឹងស៊ីជម្រៅនោះទេ អំពីប្រព័ន្ធដំណើរការរបស់វា ក៏ដូចជាតម្លៃដែលក្លឹបឬជម្រើសជាតិត្រូវចំណាយទៅលើការបំពាក់ក្នុងកីឡដ្ឋាននីមួយៗ។
ខាងក្រោមទំព័រ CTS Sports បង្ហាញរឿងរ៉ាវ ៤ ចំណុចដែលអ្នកគួរដឹងពី Goal-line Technology៖
១) ដើមកំណើត
<
វាត្រូវបានគេសម្គាល់ជាឈ្មោះម្យ៉ាងទៀតហៅថា "Goal Decision System" ដែលក្រុមប្រឹក្សាភិបាលសមាគមបាល់ទាត់អន្តរជាតិហៅកាត់ IFAB បានអនុម័តដាក់ឲ្យដំណើរការបច្ចេកវិទ្យានេះផ្លូវការនៅខែកក្កដា ឆ្នាំ ២០១២។
ប៉ុន្តែវាត្រូវបានគេទទួលស្គាល់ខ្លាំង ក្រោយពីចាប់ដាក់ឲ្យប្រើប្រាស់នៅព្រឹត្តិការណ៍ FIFA World Cup ឆ្នាំ ២០១៤ ហើយជាបន្តបន្ទាប់មាននៅលីគកំពូលទាំង ៥ ប្រចាំតំបន់អឺរ៉ុប។ បច្ចុប្បន្នមានក្រុមហ៊ុន ២ ដែលទទួលអាជ្ញាប័ណ្ណលើការដាក់ឲ្យប្រើប្រាស់នូវបច្ចេកវិទ្យាខាងលើ ដោយមួយជាក្រុមហ៊ុន Hawk-Eye របស់អង់គ្លេស និង GoalControl របស់អាល្លឺម៉ង់។
២) ដំណើរការរបស់វា
និយាយយ៉ាងខ្លី Goal-line Technology គឺជាការប្រើប្រាស់ប្រព័ន្ធបច្ចេកវិទ្យា ដើម្បីកំណត់ជំនួសភ្នែកមនុស្សថាតើបាល់បានឆ្លងផុតខ្សែគំនូសបង្គោលទី ឬអត់ ហើយទិន្នន័យដែលទទួលបានវានឹងធ្វើការបញ្ជូនភ្លាមៗក្នុងរយៈពេលតែប៉ុន្មានវិនាទី ទៅដល់នាឡិកាដែលអាជ្ញាកណ្ដាលពាក់នៅលើដៃ។ បញ្ជាក់ថាមានតែអាជ្ញាកណ្ដាលធំនៅក្នុងការប្រកួតប៉ុណ្ណោះ ដែលមានសិទ្ធទទួលបាននៅសញ្ញាបញ្ជូនមួយនេះ ហើយអ្នកទស្សនាអាចមើលការចាក់ឡើងវិញពីសកម្មភាពបាល់នោះជាទម្រង់ 3D/4D ឬក៏អត់ ស៊ីសងលើការសម្រេចពីគណៈគ្រប់គ្រងការប្រកួត។
បើសួរថាឲ្យស៊ីជម្រៅពីប្រព័ន្ធដំណើរការទាំងមូល យើងសូមបកស្រាយពីដំណើរការរបស់ក្រុមហ៊ុន GoalControl។ នោះគឺនៅក្នុងកីឡដ្ឋានមួយ មានបំពាក់នៅកាមេរ៉ា High-speed ចំនួន ១៤ គ្រាប់ ដែលចែកតំបន់បង្គោលទីម្ខាងៗ ៧ គ្រាប់ ផ្ដោតជាចម្បងទៅលើបាល់ដែលរត់ចុះឡើងពេញទីលាន។ ក្រោយទទួលបានទិន្នន័យចេញពីកាមេរ៉ានីមួយៗ នោះវានឹងបញ្ជូនតាមខ្សែកាបអុបទិកទៅក្នុងម៉ាស៊ីនកុំព្យូទ័រមេ ដើម្បីធ្វើការវិភាគនិងផ្គូផ្គងតាមរយៈកូអរដោនេ X, Y និង Z ហើយចេញជាទិន្នន័យសម្រេច។
រូបភាពដែលផលិតចេញមក នឹងបង្ហាញជាទម្រង់ 4D ហើយនៅពេលដែលគណនាឃើញថា បាល់បានឆ្លងផុតខ្សែគំនូសបង្គោលទីឬអត់ នោះវានឹងបញ្ជូនសញ្ញាភ្លាមៗ ចេញពីប្រព័ន្ធកុំព្យូទ័រទៅចូលនាឡិកាដៃរបស់អាជ្ញាកណ្ដាលដោយស្វ័យប្រវត្តិត្រឹមរយៈពេលមិនដល់ ១ វិនាទី។
ក្រៅពីការបំពាក់នៅកាមេរ៉ាតាមជ្រុងនីមួយៗនៃកីឡដ្ឋាន និងការរត់ខ្សែអុបទិកចូលទៅក្នុងម៉ាស៊ីនមេ ជាងនេះគឺមានបំពាក់នៅខ្សែបង្កប់ក្រោមដី និងជុំវិញបង្គោលទីមួយផ្សេងទៀត ហើយសូម្បីតែនៅក្នុងបាល់ដែលកីឡាករទាត់ចុះឡើងនោះ ក៏មានបង្កប់ Sensor អេឡិចត្រូនិក ដើម្បីអនុញ្ញាតឲ្យវាអាចមានអន្តរកម្មរវាងគ្នាទៅមកផងដែរ។
៣) តម្លៃនៃការបំពាក់ Goal-line Technology
តាមទិន្នន័យតម្លៃរបស់ក្រុមហ៊ុន GoalControl និង Hawk-Eye សម្រាប់ការបំពាក់នៅបច្ចេកវិទ្យាខាងលើ ក្នុងមួយកីឡដ្ឋានគឺត្រូវចំណាយថ្លៃដំឡើងសរុបចន្លោះពី ២៩០ ០០០ ទៅ ៥៨០ ០០០ ដុល្លារ ហើយរៀងរាល់ការប្រកួតគិតជាមធ្យមនៅថ្លៃថែទាំផ្សេងៗគឺចំណាយអស់ ៣ ៩០០ ដុល្លារផ្សេងទៀត។
៤) ហេតុអ្វី FIFA មិនអនុញ្ញាតឲ្យប្រើប្រាស់ Goal-line Technology នៅវគ្គជម្រុះបឋម?
ជាសំណួរចាក់ដោតដែលមានអ្នកគាំទ្រជាច្រើនចង់ដឹង ហេតុអ្វីនៅវគ្គជម្រុះបឋម ជាក់ស្តែងដូចជាការប្រកួតរវាងក្រុមជម្រើសជាតិព័រទុយហ្គាល់និងស៊ែប៊ី គ្មានការបំពាក់នៅ Goal-line Technology? ចម្លើយយ៉ាងខ្លី នោះគឺដោយសារកីឡដ្ឋាននៃក្រុមដែលត្រូវចូលរួមការប្រកួតវគ្គជម្រុះបឋមទាំងអស់ មិនទាន់មានលទ្ធភាពគ្រប់គ្រាន់ក្នុងការចំណាយ ពោលគឺកីឡដ្ឋាននៃប្រទេសខ្លះមាន ប្រទេសខ្លះពុំទាន់មាន ហេតុនេះ FIFA ក៏សម្រេចជាឯកច្ឆន្ទនិងស្មើភាព ដោយមិនអនុញ្ញាតឲ្យប្រើប្រាស់ទាំង VARនិង Goal-line Technology នៅវគ្គនេះតែម្តង៕