អតីតកីឡាកររបស់ Tottenham លោក Jermain Defoe បានណែនាំឲ្យ Harry Kane ត្រូវតែចាកចេញពីក្លឹបប្រសិនណាចង់ឈ្នះពានរង្វាន់ក្នុងអាជីព។
ជាការពិតកីឡាករអង់គ្លេសចាយពេលនៅអាជីពបាល់ទាត់រយៈពេលជាង ១០ ឆ្នាំមកហើយ ដោយជាមួយ Spurs រកបាន ២១៦ គ្រាប់។ ពីររដូវកាលមុននៅ UCL បានឡើងទៅវគ្គផ្តាច់ព្រ័ត្រ តែបរាជ័យក្រោមថ្វីជើងរបស់ Liverpool រីឯនៅរដូវកាលនេះកំពុងមានក្តីសង្ឃឹមនៅពាន Carabao Cup ដែលត្រៀមប៉ះ Man City នៅវគ្គចុងក្រោយនាខែមេសា។
យ៉ាងណាលោក Defoe បាននិយាយប្រាប់ talkSPORT ថា៖ “ប្រសិនអ្នកសួរសំណួរនេះមកខ្ញុំនៅប៉ុន្មានឆ្នាំមុន ខ្ញុំនឹងនិយាយថា គេគួរតែនៅទីនេះ តែអ្វីដែលគេបានសម្រេចកន្លងមក គឺរាប់បានហើយថាគេជាវីរបុរសប្រចាំក្លឹប Spurs”។
លោកបន្ថែម៖ “ប្រសិនណា Kane ចង់ឈ្នះពានរង្វាន់ គឺគេត្រូវតែចាកចេញ ខ្ញុំមិនគិតថាងាយស្រួលសម្រាប់គេនោះទេ ព្រោះគេបានក្លាយឈ្មោះជាអ្នកស៊ុតបញ្ចូលទីច្រើនបំផុតប្រចាំក្លឹប Spurs តែគេអាចនឹងឈ្នះពានរង្វាន់នៅទីនោះតិចតួចបំផុត ខុសពីការចាកចេញគឺគេនឹងអាចឈ្នះពានច្រើន”៕
ប្រភព៖ AF