ព័រទុយហ្គាល់ប៊ិះតែនឹងអាចយកឈ្នះទៅលើស៊ែប តាមរយៈគ្រាប់បាល់ចុងម៉ោងរបស់ Cristiano Ronaldo ប៉ុន្តែអាជ្ញាកណ្តាលបែរជាមិនផ្តល់ឲ្យ ដោយសម្រេចថាខ្សែការពារអាច Clear បាល់នោះចេញ ហើយបាល់មិនទាត់ចូលផុតខ្សែបន្ទាត់ឡើយ។
យ៉ាងណា CR7 ក៏ដូចជាអ្នកគាំទ្ររបស់ព័រទុយហ្គាល់ មានការខឹងសម្បាជាខ្លាំង ដោយដល់ថ្នាក់ Ronaldo ដើរចេញពីការប្រកួតមុនបញ្ចប់តង់ទៀតផង។ ពុំមានការតវ៉ាអ្វីនោះទេ ដោយចុងក្រោយបានត្រឹមពាក្យសុំទោសពីអាជ្ញាកណ្តាលលើទីលានតែប៉ុណ្ណោះ។ នេះបើតាមការបញ្ជាក់ពីអ្នកចាត់ការលោក Fernando Santos។
ថ្លែងលើប៉ុស្តិ៍ RTP របស់ព័រទុយហ្គាល់លោក Santos និយាយថា៖ “យើងពិតជាបានរកគ្រាប់បាល់ នៅបាល់មិនឲ្យនោះពិតមែន ដោយនៅកម្រិតប្រកួតផ្លូវការបែបនេះ វាមិនសមកើតឡើងការកាត់សេចក្តីបែបហ្នឹងឡើយ”។
លោកបន្ត៖ “អាជ្ញាកណ្តាលបានត្រឹមមកសុំការអភ័យទោសពីខ្ញុំ ហើយនិយាយក្រោយចប់ការប្រកួតថាគាត់ពិតជាខ្មាសអៀននឹងខ្លួនឯងខ្លាំងណាស់ នៅក្នុងបន្ទប់ផ្លាស់សំលៀកបំពាក់គាត់បានសុំទោសខ្ញុំ តែប៉ុណ្ណឹងឯង”។
“ពិតមែនហើយអាជ្ញាកណ្តាលក៏ជាមនុស្សដែរ ចេះបង្កើតកំហុសដូចគ្នា បែបហ្នឹងទើបគេកំណត់ឲ្យមាន VAR និងបច្ចេកវិទ្យា Goal line ដើម្បីបញ្ចៀសនៅរឿងនេះ”៕
ប្រភព៖ DailyMail