នាវេលាម៉ោង ០២:៤៥ នាទីរំលងអាធ្រាត្រឈានចូលថ្ងៃទី ៧ មិនា នៅលើទំព័រ CTS Sports នឹងមានការផ្សាយផ្ទាល់នៅជំនួបរវាងក្រុម Juventus ទល់ Lazio ដែលជាប្រកួតដ៏ក្តៅគគុកប្រចាំសប្តាហ៍នៅ Serie A។
មុនឈានដល់ការប្រកួត យើងក៏សូមធ្វើការបង្ហាញនូវស្ថិតិខ្លះៗ សមាសភាពកីឡាករ ក៏ដូចជាគ្រាប់បាល់ទស្សន៍ទាយដែលអាចនឹងកើតឡើង។ នៅ ៥ ប្រកួតចុងក្រោយសម្រាប់ Juventus ជាក្រុមឈរលេខ ៤ ឈ្នះ ៣ ស្មើ ១ ចាញ់ ១ រីឯ Lazio ជាក្រុមឈរលេខ ៧ ឈ្នះ ៣ ចាញ់ ២។
ស្ថិតិនៃការជួបគ្នារវាងក្រុមទាំងពីរ ធ្លាប់កើតមាន ១៧៦ លើក ខាង Juventus ឈ្នះ ៩១ លើក ស្មើ ៤១ លើក និងចាញ់ ៤៣ លើក។ លើកចុងក្រោយដែលក្រុមទាំងពីរជួបគ្នាគឺស្មើ ១-១ ដែលជាប្រកួតជើងទី ១ នៅ Serie A។
សម្រាប់យប់នេះខាង Juventus អាចអន់ថយនៅតំបន់ការពារបន្តិច ដោយខ្សែការពារសំខាន់ Giorgio Chiellini បានរងរបួស ហើយវត្តមាន Leonardo Bonucci និង Juan Cuadrado ក៏មិនប្រាកដប្រជា រីឯនៅតំបន់បម្រើទំនងអវត្តមាន Paulo Dybala ឬ Arthur ថែមទៀត។
រីឯ Lazio វិញ គឺអវត្តមាន Manuel Lazzari ហើយខ្សែការពារ ២ រូបដ៏សំខាន់គឺ Luiz Felipe និង Stefan Radu ក៏មិនទាន់អាចចូលរួមបានដោយសាររបួស។ និយាយដោយសាមញ្ញទៅក្រុមទាំងសងខាងគឺអាចលេងមិនពេញជើងដូចគ្នានៅរាត្រីនេះ។
សមាសភាពក្រុមទាំង ២ អាចនឹងកើតឡើងដូចខាងក្រោម៖
Juventus: Szczesny; Danilo, Demiral, De Ligt, Sandro; Chiesa, Ramsey, Rabiot, McKennie; Kulusevski, Ronaldo
Lazio: Reina; Patric, Parolo, Acerbi; Marusic, Milinkovic-Savic, Leiva, Alberto, Lulic; Correa, Immobile
ហេតុផលត្រួសៗខាងលើហើយ នាំឲ្យយើងហ៊ានរំពឹងទុកថា Juventus នឹងស៊ី Lazio ២-១ ឬមានភាគរយអាចកើតឡើងនៅលទ្ធផលស្មើ ហើយ Lazio នឹងអាចគាស់កំណត់ត្រាដែលខកខានកើតមាននៅរដូវកាល ២០០៥/០៦ ពោលជាការតតាំងដោយមិនស្គាល់ពាក្យថា “ចាញ់” នៅប្រកួតនារដូវកាលទោល៕