វីរបុរសបាល់ទាត់ពិភពលោក Pele បានទទួលការចាក់វ៉ាក់សាំងកូវីដ១៩ ដូសទី១ហើយនៅប្រេស៊ីលកាលពីម្សិលមិញនេះ។
អតីតខ្សែប្រយុទ្ធវ័យ៨០ឆ្នាំខាងលើនេះស្ថិតក្នុងចំណោមបុគ្គលត្រូវទទួលវ៉ាក់សាំងនៅប្រេស៊ីល ដែលបច្ចុប្បន្ននេះមានអ្នកចាក់បាន៨,៤៧លាននាក់ហើយ។ លោក Pele បាននិយាយនៅលើបណ្ដាញសង្គមថា៖ “ថ្ងៃនេះជាថ្ងៃមិនអាចបំភ្លេចបាន ខ្ញុំទទួលវ៉ាក់សាំងហើយ។ ជំងឺអាសន្នរោគមិនទាន់បញ្ចប់ទេ យើងត្រូវតែចូលរួមការពារទាំងអស់គ្នា”។
រំលឹកថាប្រេស៊ីលជាប្រទេសរងគ្រោះថ្នាក់មួយដោយសារមេរោគកូវីដ១៩។ ចាប់តាំងពីមានករណីឆ្លងមក ប្រេស៊ីលមានអ្នកឆ្លងសរុបជាង១០លាននាក់ហើយ ក្នុងនោះជាង២៥ម៉ឺននាក់បានស្លាប់ដោយសារមេរោគនេះ៕
ប្រភព៖ Marca