ខ្សែប្រយុទ្ធឆ្នើម Harry Kane ត្រូវបានគេរាយការណ៍ថា ទំនងជានឹងមិនចាកចេញពីក្លឹប Tottenham Hotspur នៅបញ្ចប់រដូវកាល ២០២០/២១ នេះទេ ពោលគឺនឹងបន្តឈរជើងយ៉ាងហោចណាស់ ១ រដូវកាលទៀត។
ការចង់ចាកចេញរបស់ Kane កើតឡើងក្រោយពី Spurs ធ្លាក់ទម្រង់លេង ហើយក៏គិតថាដល់ពេលដែលគេគួរចាកចេញទៅក្លឹបកំពូលណាមួយហើយ ព្រោះរយៈពេលជាច្រើនឆ្នាំកន្លងមកមិនទាន់បានឈ្នះពានរង្វាន់អ្វីទាំងអស់។
ក្រោមការដឹកនាំរបស់លោក Jose Mourinho ខ្សែប្រយុទ្ធវ័យ ២៧ ឆ្នាំ រកបាន ២១ គ្រាប់និង Assist ១៤ លើកនៅការបង្ហាញខ្លួន ៣៣ ប្រកួតរដូវកាលនេះ តែ Spurs បានធ្លាក់ដល់លេខ ៩ ឯណោះក្នុងតារាង PL។
តាមប្រភពពី The Telegraph បានចុះផ្សាយថា អនាគតរបស់ Kane នឹងមិនទាន់ចែកផ្លូវជាមួយ Spurs ត្រឹមប៉ុណ្ណេះឡើយ ហើយគេបន្តនៅរយៈពេល ១២ ខែទៀត ណាមួយរយៈពេលនេះក្លឹបធំៗដែលចង់បានក៏ពិបាកនឹងចំណាយលុយក្រាស់ក្រែលថែមទៀតក្នុងស្ថានភាពជំងឺ COVID-19៕
ប្រភព៖ Sportsmole