ការប្រកួតនៅលីគកំពូលអឺរ៉ុបនារដូវកាល ២០២០/២១ ត្រូវបានគេរាប់ថាជារដូវកាលដ៏គួរឲ្យចាប់អារម្មណ៍ ព្រោះគ្រប់បណ្តាលីគទាំងអស់ ក្រុមនីមួយៗសុទ្ធសឹងតែតាមពិន្ទុប្រកៀកប្រកិតគ្នាឥតឈប់ពីមួយសប្តាហ៍ទៅមួយសប្តាហ៍។
ពេលខ្លះក្រុមខ្លាំងមានលទ្ធភាពអាចយកឈ្នះក្រុមកម្រិតមធ្យម ហើយក្រុមខ្សោយបែរជាមកអាចសងសឹកជំនួសក្រុមមធ្យម យកឈ្នះក្រុមខ្លាំងទាំងមិនគួរឲ្យជឿ។
បើរាប់តែរយៈពេល ២ ខែកន្លងមកនេះ នៅទំព័រឆ្នាំ ២០២១ តើអ្នកដឹងទេថា ក្រុមណាមួយដែលមិនទាន់ស្គាល់ពាក្យថា “ចាញ់” ហើយទទួលតែលទ្ធផល ឈ្នះនិងស្មើ? ទំព័រ CTS Sports សូមធ្វើការបង្ហាញឈ្មោះក្រុមទាំង ៤ ដូចខាងក្រោម៖
ក្លឹប Manchester City នៅក្របខ័ណ្ឌ Premier League
គិតត្រឹមជុំទី ២៥ ក្រុមមេឃខៀវ Man City កំពុងឈរលេខ ១ នៅតារាង Premier League ដោយមាន ៥៩ ពិន្ទុ នាំមុខក្រុមលេខ ២ ដល់ទៅ ១០ ពិន្ទុ។ សម្រាប់ឆ្នាំ ២០២១ រាប់តែក្នុងលីគ PL ក្រុមដឹកនាំដោយលោក Pep Guardiola ឆ្លងកាត់ការប្រកួតចំនួន ១០ លើកហើយ ដោយទទួលបានជ័យជម្នះទាំង ១១ លើក។
ក្នុងនោះមានដូចជាជ័យជម្នះទៅលើ Chelsea ៣-១ កាលពីដើមខែមករា ការយកឈ្នះ West Brom ៥-០ យកឈ្នះ Liverpool ៤-១ យកឈ្នះ Tottenham ៣-០ និងចុងក្រោយនេះទើបតែយកឈ្នះ Arsenal ១-០។ សម្រាប់ City ក៏មានភារកិច្ចសំខាន់នៅពានរង្វាន់អឺរ៉ុប ដោយត្រៀមជួប Borussia Monchengladbach ជើងទី ១ UCL ដែលនឹងប៉ះគ្នានៅថ្ងៃទី ២៥ កុម្ភៈ នាវេលាម៉ោង ០៣:០០ នាទីព្រឹក មានផ្សាយផ្ទាល់លើទំព័រ CTS Sports។
ក្លឹប Barcelona នៅក្របខ័ណ្ឌ La Liga
ត្បិតបើលទ្ធផលនៅរយៈពេលចុងក្រោយរាងរដាក់រដុបបន្តិចក្តី ប៉ុន្តែសម្រាប់ Barcelona ក្នុងក្របខ័ណ្ឌ La Liga គឺមិនទាន់ស្គាល់ពាក្យថា “ចាញ់” នោះទេនៅរយៈពេលជាង ៥០ ថ្ងៃចុងក្រោយនេះ។
បច្ចុប្បន្ន Barcelona កំពុងឈរលេខ ៣ មាន ៤៧ ពិន្ទុគិតត្រឹមជុំទី ២៣ នៅក្របខ័ណ្ឌ La Liga។ ពួកគេឆ្លងកាត់ការប្រកួត ៨ លើក ដោយមានជ័យជម្នះធំៗដូចជាការយកឈ្នះ ៤-០ ទៅលើ Granada ការយកឈ្នះ ៥-១ ទៅលើ Alaves ហើយទើបតែស្មើមួយលើកនៅលទ្ធផល ១-១ ទល់ Cadiz កាលពីពេលកន្លងទៅ។
ចន្លោះរយៈពេលដូចគ្នានោះ ក្រុមដឹកនាំដោយលោក Ronald Koeman រមែងទទួលបរាជ័យនៅក្របខ័ណ្ឌដទៃទៀតដូចជាការចាញ់ Athletic Club នៅពាន Supercopa de Espana និងការចាញ់ PSG ស្ពឹកមុខ ៤-១ ក្នុងទឹកដី Camp Nou នៅ Champions League ជើងទី ១។
ក្លឹប Frankfurt នៅក្របខ័ណ្ឌ Bundesliga
Frankfurt រដូវកាលនេះ រាប់ថាធ្វើបានល្អគួរសម ដោយគិតត្រឹមជុំទី ២២ ពួកគេកំពុងឈរលេខ ៤ នៅតារាង Bundesliga ដោយមាន ៤២ ពិន្ទុស្មើ Wolfsburg និងចាញ់ ៧ ពិន្ទុធៀបនឹងក្រុមកំពូលតារាង Bayern Munich។
រាប់ចាប់តាំងពីដើមខែមករា មកទល់ពេលនេះ Frankfurt ឆ្លងកាត់ ៩ ប្រកួត ដោយមានដូចជាជ័យជម្នះទៅលើ Arminia ៥-១ យកឈ្នះទៅលើ Hoffenheim ៣-១ និងអ្វីដែលអស្ចារ្យនោះបានយកឈ្នះក្រុមខ្លាំង Bayern Munich ២-១ កាលពីចុងសប្តាហ៍។ ពួកគេធ្លាប់ស្មើមួយ ដោយកាលប៉ះ SC Freiburg ២-២។
នៅរដូវកាល ២០២០/២១ ក្រុមដឹកនាំដោយលោក Adi Hutter នៅសល់តែភារកិច្ចប្រជែងពានរង្វាន់ Bundesliga មួយគត់ ព្រោះនៅ DFB-Pokal ពួកគេបានធ្លាក់ត្រឹមជុំទី ២ ដែលចាញ់ Leverkusen ៤-១ កាលពីពាក់កណ្តាលខែមករា។
ក្លឹប Monaco នៅក្របខ័ណ្ឌ Ligue 1
អតីតក្លឹបចាស់របស់ Kylian Mbappe ទើបតែបានយកឈ្នះទៅលើ PSG ដោយលទ្ធផល ២-០ កាលពីយប់មិញ ហើយនេះគឺជាជ័យជម្នះលើកទី ៨ ហើយនៅការប្រកួត ៩ លើកនារយៈពេលជិត ២ ខែចុងក្រោយ។ Monaco ស្មើតែជាមួយក្លឹប Lorient មួយគត់ ក្រៅពីនោះគឺយកឈ្នះបាន ៣ ពិន្ទុទាំងស្រុងដោយមានដូចជាការបំបាក់ក្រុមខ្លាំង PSG, Montpellier និង Marseille ជាដើម។
គិតត្រឹមជុំទី ២៦ Monaco មាន ៥២ ពិន្ទុចាញ់ PSG តែ ២ ពិន្ទុគត់ ហើយចាញ់ ៦ ពិន្ទុធៀបនឹងក្រុមកំពូលតារាង Lille៕ ប្រភព៖ BeSoccer